Hungrið enn til staðar hjá Gunnari: Með augun á næsta bar­daga

Gunnar er orðinn 36 ára gamall og ferill hans í MMA teygir sig aftur til ársins 2007. Ís­lendingurinn hefur verið á mála hjá stærsta og þekktasta bar­daga­sam­bandi heims, UFC, síðan árið 2012 og ó­um­flýjan­lega nálgast hann enda­lok síns at­vinnu­manna­ferils sem getur jú ekki verið ei­lífur.

Þó er þessi braut­ryðjandi, sem vann yfirburðarsigur gegn Bandaríkjamanninum Bryan Barberena í mars á síðasta ári og er sem stendur á tveggja bardaga sigurgöngu í UFC, ekki að í­huga að leggja bar­daga­hanskana á hilluna alveg strax. Gunnar á endur­komu í búrið undir lok árs.

„Ég er bara í mjög fínu formi,“ segir Gunnar Nelson í samtali við íþróttadeild Stöðvar 2 nýkominn af æfingu í Mjölni. „Ég er að koma mér upp í enn betra form. Ég get ekki æft allan ársins hring eins og ég geri fyrir camp. Annars yrði ég bara rúm­liggjandi. Ég er því að koma mér aftur af stað núna betur og betur og er að horfa á bardaga í kringum desember. Ég væri til í að keppa á því tíma­bili.“

Eftir því sem að liðið hefur á atvinnumannaferilinn hjá Gunnari hefur hann sífellt verið að taka enn stærra skref inn í þjálfun og hjá Mjölni er hann að leiðbeina ungum MMA bardagaköppum.

„Ég svona reyni að vera ekki að spá allt­of langt fram í tímann,“ segir Gunnar aðspurður hvernig hann sjái nánustu framtíð hjá sér á bardagaferlinum. „Jú hef lengi hugsað um að fara kalla þetta gott. Skrokkurinn er alveg farinn að segja til sín og núna lengi hef ég haft á­huga á tölu­vert öðrum hlutum heldur en endi­lega sjálfum mér í þessu dæmi. Þjálfun og svo­leiðis.

En mér finnst enn mjög gaman að keppa. Mig hungrar alltaf í það. Mér finnst það enn vera svo stór partur af mér sem einstaklingi í blönduðum bardagalistum að keppa. Ég fæ mig ekki í að stoppa það af alveg strax.“

Þannig að bardagahanskarnir eru ekki á leiðinni á hilluna? 

„Ekki alveg strax. Ég finn enn fyrir því að ég er að bæta mig. Þó skrokkurinn sé ekki enn tví­tugur þá er ég að verða betri og betri með hverju árinu.“