Logi Tómasson var í vinstri bakverðinum hjá Strömsgodset í 0-0 jafntefli gegn Haugesund. Miðjumaðurinn Anton Logi Lúðvíksson kom inn af varamannabekknum hjá Haugesund á 83. mínútu.
Sveinn Aron Guðjohnsen leiddi framlínu Sarpsborg í 0-2 tapi gegn Kristiansund. Sóknarmaðurinn Hilmir Rafn Mikaelsson kom inn af varamannabekk Kristiansund á 83. mínútu en tókst ekki að setja mark sitt á leikinn.
Stefán Ingi Sigurðarsson skoraði opnunarmarkið á 9. mínútu í leik Sandefjord og Brann. Heimamenn komust tvívegis yfir í leiknum en alltaf sneru gestirnir aftur, annað jöfnunarmarkið var skorað í uppbótartíma og liðin máttu sætta sig við eitt stig hvert.
Þetta var annað mark Stefáns í jafnmörgum leikjum og hans þriðja í sex leikjum sem hann hefur spilað síðan hann kom til félagsins í sumar.
Sandefjord er í 14. sæti eftir 22 umferðir. Í fallbaráttu, líkt og Haugesund og Stromsgödset sem sitja í sætunum fyrir ofan.
Pakkinn er mjög þéttur, átta umferðir eru eftir af tímabilinu og aðeins níu stigum munar milli neðsta liðsins í 16. sæti og liðsins í 7. sæti.
