Felldu tugi og brenndu forsetaflugvélina

Umræddir vígamenn tilheyra Jama'at Nusrat al-Islam wal Muslimeen eða JNIM en sá vígahópur er nátengdur Al-Qaeda.

Árásin beindist meðal annars að herflugvelli og þjálfunarstöð þar sem lögregluþjónar eru þjálfaðir. Myndefni sem JNIM hefur birt gefur til kynna að mannfall hafi verið mikið og hafa þeir meðal annars birt myndband sem sýnir fjölda brenndra líka í bragga.

Myndbönd gefa til kynna að JINM hafi haldið flugvellinum um nokkuð skeið, án mótspyrnu frá hernum.

AFP hefur eftir heimildarmönnum sínum í landinu að rúmlega sjötíu manns hafi fallið í árásinni. Vígamennirnir hafa haldið því fram að hundruð hafi fallið og þar á meðal hafi verið rússneskir málaliðar, sem aðstoðað hafa herforingjastjórnina.

Herforingjastjórnin hefur enn ekkert sagt um mannfall annað en að „einhverjir“ hafi fallið.

Þetta er í fyrsta sinn um árabil sem vígamenn hafa gert árás sem þessa í Bamako, samkvæmt frétt France24, þó sambærilegar árásir hafi verið tíðar í öðrum hlutum landsins. Vígahópum eins og AQ og Íslamska ríkinu hefur vaxið ásmegin í Malí og öðrum ríkjum Vestur-Afríku, eins og Búrkína Fasó og Níger á undanförnum árum.

Ástandið í Malí hefur verið slæmt um árabil en árið 2012 hófst uppreisn í norðurhluta landsins sem stóð yfir þrjú ár. Þá var gert friðarsamkomulag en hryðjuverkahópar hafa notað ástandið til að stækka og hafa þeir gert fjölmargar árásir á svæðinu.

Eftir valdarán hersins árið 2020 myndaðist mikil spenna aftur milli hersins og uppreisnarmanna í norðurhluta landsins og hefur komið til átaka þar á milli.

Í sumar sátu uppreisnarmenn fyrir bílalest hermanna frá Malí og rússneskra málaliða og ollu miklu mannfalli. Þegar hermennirnir og málaliðarnir hörfuðu lentu þeir í öðru umsátri þegar vígamenn JNIM sátu fyrir þeim.

Sífellt versnandi ástand

Nokkrum dögum fyrir árásina á þriðjudaginn hélt Goita ræðu þar sem hann lýsti því yfir að her hans hefði skaðað vígahópa í Malí verulega og veikt þá. Ræðuna hélt hann á viðburði þar sem markað var afmæli bandalags herforingjastjórnanna í Malí, Búrkína Fasó og Níger.

Sjá einnig: Herforingjastjórnir Vestur-Afríku snúa bökum saman

Herforingjastjórnir þessar hafa vísað frönskum og bandarískum hermönnum úr landi og þess í stað þegið aðstoð Rússa í formi málaliða. Áður voru margir þessarar málaliða á vegum Wagner-Group, sem rússneski auðjöfurinn Jevgení Prígósjín rak. Eftir að hann dó tók varnarmálaráðuneyti Rússlands að mestu yfir starfsemi málaliðahópsins.

Ráðamenn á Vesturlöndum hafa sakaði málaliðana um að fremja ýmis ódæði í þessum ríkjum og ræna auðlindum þeirra. Sérfræðingar sem vakta ástandið þar segja einnig að ódæði hersins og málaliðanna reki sífellt fleiri í faðm vígahópa á svæðinu, eins og fram kemur í frétt Wall Street Journal.

Sjá einnig: Hermenn og rússneskir málaliðar tóku hundruð af lífi í Malí

Miðillinn segir Bandaríkjamenn vera að koma sér fyrir í Benín og á Fílabeinsströndinni til að reyna að sporna gegn upprisu þessara vígahópa. Einnig eigi sér stað viðræðum um að hýsa sérsveitarmenn í Tjad.

Frakkar eru sagðir í svipuðum hugleiðingum í Gabon, Senegal, Fílabeinsströndinni og Tjad. Ráðamenn í þessum ríkjum eru sagðir óttaslegnir yfir ástandinu við Gíneaflóa og óttast að það muni dreifast enn frekar á komandi árum.