Máttu vita að eiturlyfjasalinn þeirra væri að flytja inn eitur­lyf

Í dómi Héraðsdóms Reykjavíkur, sem kveðinn var upp á miðvikudag í síðustu viku, segir að málið hafi verið dómtekið þann 22. ágúst síðastliðinn og höfðað með ákæru Héraðssaksóknara þann 15. maí síðastliðinn á hendur þeim Michal Szematowicz, Sólveigu Júlíu Linnet, Sigfúsi Má Dagbjartarsyni og Wojciech Kaczorowski.

Michal hafi verið ákærður fyrir að hafa flutt inn og reynt að taka á móti og varsla samtals 6,78 lítra af amfetamínbasa, með 60 til 62 prósenta styrkleika, ætluðu til söludreifingar hér á landi og fengið Sólveigu Júlíu og Sigfús Má til að vera skráðir móttakendur hvort fyrir sinni sendingunni, sem bárust hingað til lands með póstsendingu frá Þýskalandi þann 19. febrúar síðastliðinn.

Lögregla hafi lagt hald á fíkniefnin á póstafgreiðslustöð Icetransport við Selhellu 9, Hafnarfirði, og skipt þeim út fyrir gerviefni. Michal hafi síðan fengið þau Sólveigu Júlíu, Sigfús Má og Wojciech til að sækja sendingarnar þann 23. febrúar síðastliðinn og koma þeim til Michal.

Amfetamín í vín- og ilmvatnsflöskum

Sigfús Már hafi verið ákærður fyrir að hafa gert tilraun til þess að taka við 3,31 lítrum af amfetamínbasa, sem falinn hafi verið í níu áfengisflöskum, sem komu hingað til lands með póstsendingu frá Þýskalandi.

Sigfús Már bar meðal annars fyrir dómi að tvær grímur hefðu runnið á hann þegar hann tók eftir því að engar loftbólur voru í kampavínsflöskunum.

Sólveig Júlía og Wojciech hafi svo verið ákærð fyrir að reyna að taka á móti 3,47 lítrum af amfetamínbasa, sem falinn hafi verið í sextán snyrtivöruflöskum. Snyrtivöruflöskurnar hafi sömuleiðis komið frá Þýskalandi.

Kannaðist ekki sölu fíkniefna þrátt fyrir milljónamillifærslur

Í niðurstöðukafla dómsins segir að Sólveig Júlía og Sigfús Már hafi bæði viðurkennt að Michal hefði í gegnum tíðina selt þeim fíkniefni, nánar tiltekið Oxycontin. Fyrir liggi í gögnum málsins að þau hafi millifært talsverðar fjárhæðir inn á reikning Michals.

Hann hafi þrátt fyrir það neitað að hafa staðið að sölu fíkniefna. Í málinu liggi fyrir upplýsingar um umfangsmiklar millifærslur á bankareikningi Michal. Á tímabilinu 1. janúar 2023 til 12. mars 2024 hafi 220 einstaklingar einstaklingar lagt samtals 21.271.665 krónur inn á reikninga hans í samtals 1389 færslum. Á þessum tíma hafi Michal sagt að hann hafi að mestu leyti við óvinnufær.

Hann hafi borið fyrir sig að hann hefði haft tekjur af því að leigja út hljóðver á tímabilinu. Dómurinn taldi þrátt fyrir það sannað að hann hefði stundað fíkniefnasölu.

Í dóminum segir að þegar horft er til allra atvika, einkum umtalsverðra millifærslna inn á bankareikning Michals, fjölda smáskilaboða í farsíma um sölu á fíkniefnum, sem auk þess fái stoð í framburði Sólveigar Júlíu og Sigfúsar Más, bankaupplýsingum og símagögnum, meðal annars í tengslum við umræddar póstsendingar,og óstöðugs og ótrúverðugs framburðar Michals, yrði fallist á með ákæruvaldinu að lögfull sönnun hafi tekist fyrir því að Michal hafi flutt inn og reynt að taka á móti og varsla samtals 6,78 lítra af amfetamínbasa ætluðum til söludreifingar hér á landi og fengið Sólveigu Júlíu og Sigfús Má til að vera skráðir móttakendur fyrir hvort sinni sendingunni.

Sögðust ekki hafa vitað af amfetamíninu

Hvað varðar ákærur á hendur Sólveigu Júlíu, Sigfúsi Má og Wojciech segir að þau hafi borið fyrir sig að þeim hafi verið alls ókunnugt um upphaflegt innihald póstsendingarinnar, þau hafi verið í góðri trú um að þau væru að sækja og móttaka póstsendingu með lögmætu innihaldi.

Í skýrslu Sigfúsar Más fyrir dómi hafi komið fram að hann hefði sótt pakka fyrir Michal, sem hafi selt honum oxy-töflur. Hann hafi tvisvar sinnum áður verið skráður fyrir pakka sem Michal hafi átt að fá og fengið þá skýringu að Michal hafi ekki verið skráður með lögheimili hér á landi. Michal hafi alltaf lagt inn á hann fyrir póstgjöldum. 

Sigfús Már hafi jafnframt staðfest að hann hefði farið með Michal að sækja sendingarnar. 

Með hliðsjón af umstangi við að skrá pakkann á sig, sækja pakkann með Michal, sem hefði margítrekað selt honum fíkniefni og greitt honum með fíkniefnum fyrir viðvikið, verði að telja að Sigfús Már hafi vitað eða mátt vita að sendingin innihéldi fíkniefni. Samkvæmt framansögðu verði Sigfús Már sakfelldur fyrir þá háttsemi sem honum er gefin að sök.

Fékk tuttugu þúsund krónur fyrir

Sólveig Júlía hafi fyrir dómi upplýst um aðkomu sína að málinu með svipuðum hætti og Sigfús Már en hafi ekki viljað tjá sig um fyrri sendingar.

Óumdeilt sé að hún hafi átt að fá tuttugu þúsund krónur fyrir að sækja umræddan pakka og í gögnum málsins séu bankafærslur sem sýni greiðslur frá Michal til Sólveigar Júlíu á sama tíma og hún sótti sendingarnar. 

Sólveig Júlía hafi vísað til þess að Michal hafi sagt henni að í pakkanum væri veipvökvi, þótt enginn slíkur vökvi væri í lýsingu með pakkanum. Hún hafi viðurkennt að henni hefði fundist skrýtið að vera beðin um að vera skráð fyrir pakkanum.

Með hliðsjón af umstangi við að skrá pakkann á sig, sækja pakkann með Michal, sem hefði margítrekað selt henni fíkniefni og greitt með peningum fyrir viðvikið, verði að telja að hún hafi vitað eða mátt vita að sendingin innihéldi fíkniefni. 

Samkvæmt framansögðu verði Sólveig Júlía sakfelld fyrir þá háttsemi sem henni er gefin að sök.

Bjó heima hjá Michal

Hvað varðar hlut Wojciechs segir að þegar horft sé til þess umstangs sem fylgir því að sækja Sólveigu Júlíu, sem hann hefði aldrei séð, til að sækja pakka sem hann hafi síðan átt að afhenda Michal, verði fallist á með ákæruvaldinu að komin sé lögfull sönnun um að Wojciech hafi vitað eða mátt vita að sendingin innihéldi fíkniefni. 

Þá yrði ekki horft framhjá því að Wojciech þekki Michal mjög vel og hafi búið í húsnæði hans, þar sem fíkniefni hafi verið meðhöndluð, auk þess sem hann sé sjálfur að auglýsa fíkniefni á Telegram-reikningi sínum. 

Samkvæmt framansögðu yrði Wojciech sakfelldur fyrir þá háttsemi sem honum er gefin að sök í ákæru, en þó þyki í ljósi þess hversu veigalítill þáttur hans var í brotinu vera forsendur til þess að heimfæra háttsemi hans undir hlutdeild í broti hinna þriggja.

Tvö til sex ár

Í dómsorði segir að Wojciech sæti fangelsi í tvö ár, Sólveig Júlía í þrjú ár, Sigfús Már í þrjú ár og Michal í sex ár. Frá refsingu allra dragist gæsluvarðhald frá 24. febrúar þessa árs til 1. mars í tilfelli Sólveigar Júlíu og Sigfúss Más, 7. mars í tilfelli Wojciechs og 13. september í tilfelli Michals.

Þá Michal dæmdur til að greiða 4,4 milljónir króna í málsvarnarlaun skipaðs verjanda og Sólveig Júlía, Sigfús Már og Wojciech 2,2 milljónir hvert um sig.