Morata í stríði við bæjar­stjóra sem er stuðnings­maður Inter

Morata gekk í raðir Milan frá Atlético Madrid fyrir tímabilið. Í stað þess að búa í Mílanó keypti Spánverjinn sér hús í bænum Corbetta sem er rúmlega 27 kílómetrum frá stórborginni. Morata vonaðist til að hann fengi meira næði þar með fjölskyldu sinni en í Mílanó.

Ekkert verður hins vegar af því að Morata búi í Corbetta. Á miðvikudaginn greindi bæjarstjórinn Marco Ballarini nefnilega frá því að Morata væri að flytja til bæjarins.

Í færslu á Instagram sagðist Morata vera hættur við að búa í Corbetta þar sem bæjarstjórinn hefði rofið friðhelgi einkalífs hans og stofnað öryggi barna hans í hættu eftir að hann tilkynnti að framherjinn væri fluttur til bæjarins.

Í kjölfar færslu Moratas birti Ballarini mynd af merki Inter á samfélagsmiðlum. Við það skrifaði hann einfaldlega bless. Ballarini er stuðningsmaður hinna bláu og svörtu, erkifjenda Milan.