„Einstaklingsmistök að kosta okkur stigin og við þurfum að hætta því“

„Við getum ekki unnið leiki þegar við gerum svona mistök. Við vorum 1-0 yfir lengi og börðumst vel en þeim tókst samt að taka 1-2 forystu. Við gerum vel að jafna leikinn, rétt áður fór boltinn í hönd varnarmanns, við sáum það skýrt í sjónvarpinu og ég skil ekki af hverju það var ekki skoðað. Þetta var furðulegur leikur en við gáfum þeim sigurinn með mistökum Hákonar, sem hefði mátt skoða líka, hann var tæklaður. Gríðarlega svekkjandi að skora tvö mörk í báðum leikjum en geta ekki gert betur varnarlega,“ sagði hann við Val Pál Eiríksson á Stöð 2 Sport inntur eftir viðbrögðum eftir leik.

Ósáttur með dómgæsluna

Í tvö skipti vildi Ísland að dómari leiksins myndi líta í VAR skjáinn, þegar skot Orra Steins var varið á línu og þegar virtist brotið á markmanninum Hákoni Rafni í þriðja marki Tyrkja.

„Ég var að skoða þetta, fannst höndin klárlega ekki í náttúrulegri stöðu og boltinn fer í hana. Ég skil þetta ekki, en stundum falla hlutirnir ekki með þér. Við hefðum samt átt að gera betur og hirða allavega eitt stig.“

Ekki sama ákefð í seinni hálfleik

Áður en að þessum vafaatriðum kom, allan fyrri hálfleikinn raunar, virtist íslenska liðið með ágætis stjórn á leiknum. Tyrkir ógnuðu sífellt en áttu erfitt með að komast að marki Íslands.

„Við vörðumst vel og vorum aggressívir en við mættum ekki eins út í seinni hálfleik. Í fyrsta markinu erum við of langt frá skotmanninum, við þurfum að vera þéttari og sýna meiri ákefð þegar við verjumst svona lágt. Það er eitthvað sem við þurfum að vinna í.“

Suss

Viðtalið var þá truflað af Tyrkjum sem gengu framhjá sáttir með sigurinn og höfðu hátt. Åge bað um þögn með alþjóðatungumálinu: Sss!

Síðan sagði hann stigasöfnunina í þessu verkefni mikil vonbrigði. Ísland hafi átt að vinna Wales á föstudaginn og taka allavega eitt stig gegn Tyrkjum í kvöld.

„Þetta er ekki nóg, því miður. Tilfinningin er að það séu einstaklingsmistök að kosta okkur stigin og við þurfum að hætta því. Ég segi þetta við leikmenn líka, fótbolti er leikur mistaka en þetta er að kosta okkur of mikið.“

Framherjaparið ljósið í myrkrinu

Það er þó eitthvað jákvætt sem Åge tekur út úr leikjunum tveimur fyrir næsta verkefni í nóvember.

„Frábært framherjapar, Andri og Orri sýndu það í dag og voru öflugir í báðum leikjum. Við erum með unga leikmenn sem eru að stíga upp, þetta lítur vel út en við verðum að vera traustari varnarlega. Mjög stór mistök sem kosta okkur leikinn,“ sagði Åge að lokum. 

Viðtalið í heild sinni má sjá í spilaranum hér fyrir ofan.