Reikna með tæp­lega þrjá­tíu milljarða minni fjár­festingu í Car­b­fix

Gert var ráð fyrir að fjárfest yrði í Carbfix, sem er dótturfélag Orkuveitunnar, fyrir um 68 milljarða króna í síðustu fjárhagsspá Orkuveitunnar fyrir árin 2024 til 2028. Í uppfærðri spá sem Orkuveitan kynnti í gær er reiknað með mun minni fjárfestingu í dótturfélaginu: 39,6 milljörðum króna til 2029. 

Coda Terminal, kolefnisförgunarmiðstöðin sem Carbfix hyggst reisa í Hafnarfirði, er áfram stærsta fjárfestingin. Nú er hins vegar ekki lengur reiknað með annarri slíkri miðstöð sem gert var ráð fyrir í fjárhagspánni frá því í fyrra.

Snorri Þorkelsson, fjármálastjóri Orkuveitunnar, segir ástæðuna þá að tímaplön hafi hliðrast og því sé aðeins reiknað með Coda Terminal á tímabilinu sem uppfærða fjárhagsspáin nær til. Áfram standi til að ráðast í fleiri sambærileg verkefni í framtíðinni.

Engin lántaka fyrir Carbfix

Forsenda þess að Coda Terminal-verkefnið verði að veruleika er að utanaðkomandi fjárfestar fáist til þess að leggja því til hlutafé. Snorri segir viðræður fari nú fram við erlendan aðila og að þær séu komnar nokkuð langt.

„Þetta er verkefni af þeirri stærðargráðu að þetta er forsenda fyrir því að verði farið í verkefnið,“ segir Snorri við Vísi.

Carbfix fékk sautján milljarða króna styrk frá Evrópusambandinu til þess að byggja upp Coda Terminal, sem er stærstu styrkur sem íslenskt fyrirtæki hefur fengið úr sjóðum þess, en hann verður greiddur út eftir því sem verkefninu vindur fram.

Þrátt fyrir að Orkuveitan reikni með að slá ný lán upp á rúma 145 milljarða króna næstu fimm árin verða þau að engu leyti vegna Carbfix. Snorri segir þó hugsanlegt að á síðustu stigum verkefnisins verði leitað eftir sjálfstæðri lánsfjármögnun hjá Carbfix, mögulega upp á þrjá til fjóra milljarða króna.

„Þannig að Orkuveitan sem slík mun ekki fjármagna þetta verkefni,“ segir fjármálastjórinn.

Með varaáætlanir ef Coda Terminal verður hafnað í Hafnarfirði

Áberandi andstaða hefur verið við Coda Terminal-verkefnið í Hafnarfirði. Formaður bæjarráðs Hafnarfjarðar sem er jafnframt formaður starfshóps um verkefni Carbfix, sagði á íbúafundi fyrr í þessum mánuði að íbúakosning yrði haldin ef samkomulag næðist á milli fyrirtækisins og bæjarins um förgunarmiðstöðina.

Af þessum sökum reiknar Orkuveitan nú með því að framkvæmdir við Coda Terminal seinki um eitt ár. Þær hefjist árið 2026 en upphaflega stóð til að þær hæfust strax á næsta ári.

Snorri segir að fari svo að Hafnfirðingar hafni verkefninu í einhvers konar bindandi íbúakosningu séu nokkrar aðrar staðsetningar fyrir förgunarstöðina nú þegar til skoðunar.

„Það er alveg verið að vinna að plani B, C, og D. Planið er ekkert að þessi staðsetning í Hafnarfirði verði eina staðsetningin. Það hefur alltaf verið inni í myndinni að skoða aðrar staðsetningar líka því í rauninni hentar landið allt mjög vel í þessa starfsemi,“ segir Snorri.

Ef Carbfix þyrfti frá að hverfa í Hafnarfirði tefði það opnun förgunarmiðstöðvar eitthvað en Snorri segir erfitt að segja til um hversu mikið. Nú sé verið að ljúka umhverfismati á Coda Terminal við Straumsvík en það sé tímafrekasti þátturinn í að velja stöðinni annan stað.