„Ekki stoltur af því að hafa verið partur af eitraðri menningu“

„Þetta er auðvitað ekki nýtt og hefur verið rætt áður. Um þennan tíma á X-inu. Ég hef ekki séð þessa bók í áratugi, hún var gefin út í lok árs 1998, ég hef aldrei átt eintak. Ég kom ekki að því að taka saman listana í þetta. Þeir Jón Atli og Þossi gerðu það. Þeir fengu greitt fyrir hana, ég ekki,“ segir Sigmar.

Nú er sláturtíð. Fjölmiðlar fara í saumana á fortíð frambjóðenda og mál Þórðar Snæs Júlíussonar, frambjóðanda fyrir Samfylkingu, er í fersku minni.

Nú hefur verið dregin fram í dagsljósið bók sem Fínn miðill gaf út árið 1998 og varðar Sigmar. Framkvæmdastjóri þess fyrirtækis var á þeim tíma Guðlaugur Þór Þórðarson loftslagsráðherra með meiru. Bókin Topp-10 listinn sem var fastur dagskrárliður á útvarpsstöðinni X-inu 97,7 undir aldamót. Höfundar eru þeir Sigmar Guðmundsson, Þorsteinn Hreggviðsson og Jón Atli Jónasson. Sigmar er til að mynda ekki á forsíðu bókarinnar og það var ástæða fyrir því.

Normið var svartur grófur húmor

„Þeir eru allir í hópi fyrstu dagskrárgerðarmanna sem réðust til stöðvarinnar þegar hún fór í loftið. Þeir hafa þó alltaf haldið hópinn þó lífið hafi beint þeim í ólíkar áttir og eru að vissu leyti eins og skytturnar þrjár. Einn fyrir alla og allir fyrir topp-10 listann,“ segir á bókarkápu.

Um er að ræða grínbók en í því andrúmi sem nú ríkir, þar sem allt verður bókstaflegt, gæti bókin innihaldið setningar sem þeir vilja síður standa að baki núna og mætti gjarnan túlka sem þrungna kvenfyrirlitningu. Hér eru fáein dæmi:

„Mér finnst eðlilegt að ríkari kröfur séu gerðar til kjörinna fulltrúa með svona mál en einhverra annarra,“ segir Sigmar og hefur ekkert á móti því að ræða þessa bók. Hann segir flesta listana, sem hann hafði ekki mikið af að segja, vera tekna úr þáttum sem tóku við eftir að hann hætti og réðst þá skömmu síðar til fréttastofu Ríkisútvarpsins. Sigmar segir jafnframt bókina ekki vera neitt leyndarmál, hún hafi komið út og orðin hafi verið sögð í útvarpið þannig að þúsundir heyrðu.

„Þó flestir listarnir skrifist á þá eru einhverjir þarna á sameiginlegri ábyrgð okkar Þossa. Þetta er því miður af sama meiði og oft var á þeim tíma; baneitruð karlmennska ríkti. Í þessum þáttum á X-inu og víðar. Þetta var norm, svartur og grófur húmor var norm, og litlar sem engar athugasemdir gerðar við það því miður.“

Mjög eitraður tími

Sigmar segir unga útvarpsmenn hafa verið að apa eftir erlendum grínistum á borð við Eddy Murphy, sem gaf út uppistandssýninguna Raw, Andrew Dice Clay og útvarpsmanninn Howard Stern.

„Þarna voru á þessum tíma nokkrir þættir með sama svarta húmorinn á þessu tímabili, bæði á X-inu og Aðalstöðinni. Þarna var eitt og annað látið flakka sem var eitrað en fáir gerðu athugasemd við þá - illu heilli, þetta eitraða dæmi þótti miklu eðlilegra þá en nú er.“

Sigmar segist ekki stoltur af öllu því sem hann sagði opinberlega meðan hann var útvarpsmaður á X-inu.

„Þetta var mjög eitraður tími. Og mér finnst ekki gaman að vera titlaður meðhöfundur þessarar bókar. Enda er það sem þarna er sagt ekki í neinum takti við það sem þykir eðlilegt í dag og engan veginn í samræmi við það sem mér finnst í dag. Þetta átti að vera einhvers konar grín, ósmekklegt og eins og ég hef áður sagt, þá hef ég aldrei verið stoltur af því að hafa tekið þátt í sumu því sem þarna var í gangi.“

Ekkert að því að gera þetta tímabil upp

Eins og áður sagði var Sigmar kominn á fréttastofu RÚV þegar bókin kom út og var þá oft spurður þar hvernig það væri að vera kominn þangað hafandi verið á X-inu þar sem allt var látið gossa. 

„Og ég hef margoft látið það í ljós í samtölum að mér finnist ekkert æðislegt að hafa verið hluti af þessu.“

Sigmar efast um að þetta muni reynast honum óþægur ljár í þúfu í kosningunum, þó bókina beri á góma núna sé þetta ekkert nýtt, ekki sé um að ræða neina beinagrind í hans skápum.

„Og ég get vel skilið þörfina í samfélaginu að vilja gera þetta tímabil upp. Ég hef tekið þátt í því þegar ég hef verið spurður, mér finnst ýmislegt sem sagt var á X-inu ekki til eftirbreytni.“

En finnst þér ekkert sérkennilegt við það að tekið sé upp gildismat sem ríkjandi er í dag og það borið saman við eitthvað sem sjálfsagt þótti fyrir 20 árum?

„Nei, ég ætla ekkert að vera að tala eins og ég vilji gera lítið úr þessu. Ég er ekki stoltur að hafa verið partur af eitraðri menningu og það er gott að það sé umræða um þetta. Er það ekki eins með samfélög og einstaklinga, það er að reyna að þroskast? Á þessum tíma var til að mynda talað gáleysislega um eiturlyf, dægurlagatextar voru fullir af þessu og annað … þetta var á margan hátt skrítinn tími. Þá leyfðust hlutir sem ekki þykja í lagi í dag,“ segir Sigmar.