Combs kærður fyrir að hafa látið konu hanga fram af svölum

Atvikið er sagt hafa átt sér stað heima hjá þáverandi kærustu Combs, Casöndru „Cassie“ Ventura, sem þá bjó á sautjándu hæð. Bongolan segist hafa ætlað að gista nóttina hjá Ventura en kvöldið hafi verið truflað þegar Combs hóf að berja á dyrnar hjá þeim.

Samkvæmt málsskjölunum fór Combs út á svalir þegar inn var komið, gekk að Bongolan, greip kynferðislega í hana og lyfti henni því næst upp og lét hana hanga fram af svölunum. Bongolan vó um það bil 45 kíló á þessum tíma og gat engan veginn losað sig.

Það var ekki fyrr en Ventura kom út á svalirnar sem Combs dró Bongolan aftur inn á svalirnar og kastaði henni utan í húsgögn sem þar voru. Bongolan segist ekki vita hvers vegna Combs réðist að henni með þessum hætti en hann er sagður hafa hótað henni ítrekað og beitt hana ofbeldi.

Bongolan krefst 10 milljóna dala í miskabætur.

Lögmaður Combs hefur neitað sök fyrir hönd tónlistarmannsins en það vekur athygli að frásögn Bongolan rímar við frásögn sem finna má í skjölum málsins sem Ventura sótti á hendur Combs á sínum tíma. Þar sagði að hann hefði gripið vinkonuhennar og sveiflað fram af svölum.

Mál Ventura gegn Combs endaði með sátt. Combs hélt því fram að hann væri saklaus af öllum ásökunum kærustunnar fyrrverandi, þar til myndband var birt af honum ganga í skrokk á henni á hótelgangi.

Combs situr nú í gæsluvarhaldi í New York og hefur ítrekað verið neitað um lausn gegn tryggingu.