Við förum yfir nýjustu tíðindi í stjórnarmyndun Samfylkingar, Viðreisnar og Flokks fólksins í hádegisfréttum Bylgjunnar og heyrum hljóðið í nýjum ráðherrum Viðreisnar. Hvorki formaður Samfylkingarinnar né formaður Flokks fólksins hefur viljað gefa neitt upp um sína ráðherraskipan.
Heimildir fréttastofu herma þó að Þórunn Sveinbjarnardóttir, þingmaður Samfylkingarinnar, verði forseti Alþingis - en hann kemur jafnan úr sama flokki og forsætisráðherra.
Í fréttatímanum heyrum við einnig í ungri íslenskri konu sem er búsett í Magdeburg í Þýskalandi, þar sem framin var hryðjuverkaárás í gærkvöldi. Hún segir samfélagið í sárum og erfitt að halda upp á jólahátíðina eftir svo hryllilegan atburð.
Þetta og margt fleira í hádegisfréttum á Bylgjunni klukkan tólf.