Ógeðfelldum að­ferðum lýst í á­kæru á hendur þremur

Nokkuð mikið hefur verið fjallað um frelsissviptinguna en talsverða athygli vakti á sínum tíma þegar mönnunum, sem hafa nú verið ákærðir, var sleppt úr gæsluvarðhaldi. 

Faðir fórnarlambsins sagði þá í samtali við Vísi að mennirnir hefði reynt að drepa son hans en Landsréttur ákveðið að sleppa þeim. Það væru mikil vonbrigði að dómarar við Landsrétt hafi aðeins horft til alvarlegasta áverkans, skurðar á slagæð, við mat á hvort framlengja ætti gæsluvarðhald yfir mönnunum.

Narraði æskuvin sinn til að koma í heimsókn

Í ákærunni segir að einn mannanna hafi mælt sér mót við fórnarlambið að heimili sínu í Vatnagörðum. Faðir fórnarlambsins greindi frá því á sínum tíma að maðurinn og sonur hans væru æskuvinir og hefðu verið saman í grunnskóla í Garðabæ.

„Við tókum meintan árásarmann með í skíðaferðalag í æsku. Við vorum góð við hann,“ sagði hann.

Þegar í Vatnagarða var komið hafi æskuvinurinn leitt fórnarlambið inn í herbergi, þar sem annar maður hafi beðið með límbandsrúllu í hönd. Þegar fórnarlambið sá það hafi það reynt að forða sér út en verið meinuð útganga.

Í framhaldinu hafi maðurinn sem beið kýlt fórnarlambið ítrekað í höfuð og vinstri síðu með krepptum hnefa. Á meðan hafi æskuvinurinn staðið hjá með límbandsrúlluna í hönd. Þeir hafi síðan í sameiningu bundið fórnarlambið við stól með límbandi og dragböndum og annar maðurinn klætt hann úr öllu nema nærbuxum og sokkum. 

Fyrir þetta sæta mennirnir tveir ákæru fyrir frelsissviptingu og kynferðisbrot.

Sló, steig á maga hans og lét hann afklæðast

Maðurinn sem beið fórnarlambsins í Vatnagörðum er einnig ákærður fyrir stórfellda líkamsárás, hótanir, brot gegn blygðunarsemi, kynferðislega áreitni og ólögmæta nauðung gagnvart fórnarlambinu á meðan á frelsissviptingunni stóð.

Í ákærunni segir að hann hafi meðal annars klætt hann úr fötunum gegn hans vilja og þvingað hann með ofbeldi og hótunum til að klæða sig úr fötunum, slegið hann ítrekað með flötum lófa og krepptum hnefa í höfuð og líkama og hótað honum ítrekað að slá hann með flötum lófa og krepptum hnefa, tekið hann ítrekað hálstaki, notað límband og dragbönd til þess að binda hann, slegið hann með belti í höfuðið, veitt honum hnéspörk í líkamann, meðal annars í kviðinn, rekið brot úr spegli í síðuna á honum, stigið á magann á honum og hótað því að reka brotið í hann, gefið honum tvívegis olnbogaskot í höfuð hans, tekið niður um sig buxurnar og rekið rassinn á sér í andlit hans og sagt við hann „sleiktu þetta“ og „kysstann“. 

Hann hafi dregið brot úr spegli eftir baki hans, hótað að beita hann ofbeldi með kúluhamri, slegið hann í líkamann og potað í líkama hans með röri meðal annars í höfuðið og hótað því að beita rörinu frekar gegn honum, þvingað hann til þess að klæða sig úr nærbuxunum þannig að hann var nakinn og rekið rörið í klofið á honum í tvígang þar sem hann sat í hnipri og króaður af í einu horni herbergisins, látið hann klæða sig úr nærbuxunum, tekið brot úr spegli og dregið eftir baki hans á meðan fórnarlambið bað hann um að hætta, hafa á nýjan leik tekið niður um sig buxurnar og rekið rassinn á sér í andlit hans.

Öll þessi atburðarrás hafi verið tekin upp á myndavél sem mennirnir hafi stillt upp í herberginu.

Útbreiddir áverkar

Í ákærunni segir að fórnarlambið hafi skömmu eftir þetta komist út úr herberginu og loks út úr húsinu að Vatnagörðum 18. Hann hafi hlaupið áleiðis að Vatnagörðum 22 og reynt að vekja athygli á sér með því að brjóta rúðu í húsinu.

Mennirnir tveir hafi komið að Vatnagörðum 22 og handsamað hann á ný. Maðurinn, sem ákærður er fyrir stórfellda líkamsárás, hafi dregið hann inn í bifreið þar sem hann skar hann með eggvopni í aftanverðan hægri upphandlegg.

Afleiðingar af háttsemi mannsins hafi verið þær að fórnarlambið hlaut útbreidda áverka víðsvegar um líkamann. Á aftanverðum hægri upphandlegg hafi hann hlotið fimmtán sentimetra skurð sem náði inn í þríhöfða með virkri slagæðarblæðingu, mikla bólgu á vinstri vör og á andliti vinstra megin, marbletti kringum vinstra auga og rispur á hálsi hægra megin, um það bil tuttugu sentimetra rispu á vinstri síðu, litla skurði á hægri olnboga og hægri framhandlegg og brot á ristarbeinum.

Þriðji maður kom ekki til hjálpar

Loks segir að þriðji maðurinn hafi verið ákærður fyrir líkamsárás, hótanir, kynferðislega áreitni og fyrir að hafa látið fyrir farast að koma manninum til bjargar á meðan á frelsissviptingunni stóð.

Hann hafi rekið hægri fótinn á sér í rassinn á manninum á meðan sá sem ákærður er fyrir stórfellda líkamsárás hélt honum niðri á fjórum fótum, eftir að hafa tekið niður um hann nærbuxurnar. Þá hafi hann kýlt fórnarlambið með krepptum hnefa í vinstri öxl og ýtt við því ítrekað með krepptum hnefa.

Loks hafi hann yfirgefið herbergi án þess að gera nokkrum manni viðvart um frelsissviptinguna þannig að hægt hefði verið að koma fórnarlambinu til hjálpar og þannig látið sér í léttu rúmi liggja hvað yrði um manninn.

Þess er krafist að mennirnir verði allir dæmdir til refsingar og greiðslu alls sakarkostnaðar. Þá er þess krafist af hálfu fórnarlambsins að mennirnir greiði honum fimm milljónir óskipt í skaðabætur.

Með tugi grunsamlegra milljóna

Þá er einn mannanna, æskuvinur fórnarlambsins, einnig ákærður fyrir tilraun til fíkniefnalagabrots, fíkniefnalagabrot og peningaþvætti.

Í ákæru segir að maðurinn hafi reynt að taka á móti um 530 grömmum af metamfetamínkristöllum, sem komið hafði verið fyrir í póstsendingu frá Malaví. Þegar hann tók við pakkanum af dulbúnum lögreglumanni hafi hann verið með 28 stykki af oxycodonetöflum.

Þá sætir hann ákæru fyrir peningaþvætti með því að hafa á tímabilinu 1. janúar 2020 til 4. júní 2021, tekið við, nýtt, umbreytt, afhent og/eða aflað sér ávinnings allt að fjárhæð 27.996.579 krónur með sölu og dreifingu á ótilteknu magni lyfja og eftir atvikum með öðrum ólögmætum og refsiverðum hætti.