Allir við­burðir á Ís­landi á einum stað á Vísi

„Markmiðið er að fá fólk til að fara og gera eitthvað skemmtilegt og þarna gefst lesendum Vísis kostur á að finna alla viðburði sem fara fram, á öllum sviðum og um allt land. Við takmörkum okkur ekki við neitt,“ segir Þórarinn Stefánsson, annar stofnenda og eigenda hugbúnaðarfyrirtækisins Mobilitus sem stendur á bak við nýja viðburðasíðu á Vísi.

Einfaldar lífið og gerir það skemmtilegra

„Við erum með yfir 400.000 framtíðarviðburði um allan heim í grunninum hjá okkur og til að auðvelda aðgengið látum við gervigreind flokka viðburðina og segja til um hvort viðburðurinn er til dæmis fyrir krakka, fyrir eldri borgara og einnig hverskonar viðburð um ræðir, dans, tónleikar eða hvað? Við auðveldum fólki einnig að leita svæðisbundið svo fólk sér hvað er að gerast í sinni heimasveit.“

Fjölbreytt flóra viðburða

„Allir viðburðir sem við finnum og allt sem okkur er bent á fer þarna inn. Þarna er allt frá smærri viðburðum á bókasöfnum, prjónanámskeiðum og lestrarstundum fyrir hunda til stærri viðburða, tónleika og sýninga,“ segir Þórarinn.

Hann hleður öllum viðburðum ókeypis inn en í boði er að auka sýnileika hvers viðburðar á einfaldan hátt. Þórarinn segir rannsóknir sýna að hægt sé að tvöfalda fjölda þeirra sem fara á viðburði ef fólk veit einfaldlega af þeim.

„Þau sem standa að viðkomandi viðburði geta kostað mögnun eða „boozt“ svo hann birtist á forsíðu Vísis, á Lífinu á Vísi og undirsíðum. Með því má tryggja að fólk detti um skemmtilega viðburði án þess að þurfa að leita að þeim.

Meirihluti þjóðarinnar heimsækir Vísi

Viðburðahaldarar eru stöðugt að reyna að ná til fólks, meðal annars í gegnum samfélagsmiðla og „boozta“ jafnvel fyrir helling af peningum, til dæmis á Facebook. En unga fólkið er ekki þar inni og þar fyrir utan borgar Facebook ekki skatta á Íslandi. Nú gefst hins vegar tækifæri á að ná til Íslendinga á heimavelli en yfir 87% þjóðarinnar heimsækja Vísi í hverri viku.“

Einstakt á íslenskum markaði

Viðburðasíðan fór í loftið í nóvember og er Þórarinn hæst ánægður með viðtökurnar. „Þetta svínvirkar – fullt af fólki smellir á viðburðauglýsingar á forsíðunni og þaðan á viðburðasíðuna og þaðan inn á miðasöluna. Viðburðasíðan er einstök á íslenskum markaði og er þegar farin að vekja athygli á erlendum mörkuðum. Einu sinni var hægt að fletta blöðum og sjá hvað var að gerast nú eru þau blöð sem enn eru gefin út hætt að birta viðburði framundan. Okkur hefur tekist að gera þetta á hagkvæman hátt og við og gervigreindin erum stöðugt að bæta flokkunina og grafa upp nýja viðburði til að bæta við.“