Kemur út úr skápnum tveimur árum eftir and­lát sitt

Heimildamyndin Pee-Wee as Himself fjallar opinskátt um líf Reubens sem hélt einkalífi sínu mjög huldu fyrir almenningi alla tíð.

„Ég fór dult með kynhneigð mína, meira að segja gagnvart vinum mínum, vegna sjálfhaturs eða sjálfsbjargar,“ segir Reubens í heimildamyndinni sem var frumsýnd á Sundance-kvikmyndahátíðinni fimmtudaginn 23. janúar síðastliðinn.

„Ég átti í innri baráttu með kynhneigð mína. En frægðin var miklu flóknari.“

Skelfilegt að vera stimplaður sem úrhrak

Heimildamyndin byggir á viðtölum leikstjórans Matt Wolf við Reubens en heildarmyndefnið var fjörutíu klukkustundir að lengd. Reubens var sjötugur þegar hann lést í júlí 2023 eftir krabbameinsbaráttu sem hann hafði ekki greint opinberlega frá. Heimildamyndin hafi verið hugsuð til að skýra dularfullt líf leikarans.

„Meira en nokkuð annað er ástæðan fyrir því að ég gerði heimildamyndina til að sýna fólki hver ég er í raun og veru og hversu sársaukafullt og skelfilegt það er að vera stimplaður sem eitthvað sem ég var ekki,“ sagði Reubens í hljóðupptöku sem hann tók upp daginn áður en hann dó.

„Að vera stimplaður sem úrhrak; að fólk óttist þig og treysti þér ekki,“ sagði hann einnig í myndinni og vísar þar í handtöku sína frá 1991 þegar hann var handtekinn fyrir ósiðlega berun á leið út úr klámbíói í Sarasota í Flórída.

Málið vakti mikla athygli og voru leikföng byggð á Pee-Wee Herman til að mynda tekin úr verslunum Toy 'R Us og mikið hæðst að Reubens í grín- og spjallþáttum. Fjöldi listamanna og samstarfsmanna Reubens lýstu yfir stuðningi við Reubens og aðdáendur hans héldu fjöldafundi til að mótmæla ákvörðun CBS um að taka endursýningar á Pee-Wee's Playhouse af dagskrá.

„Kom út úr skápnum og svo fór ég aftur inn í hann“

Reubens játaði ekki sekt í málinu heldur svaraði með svokallaðri „no contest“-málsvörn sem þýddi að brotið fór ekki á sakaskrá hans en hann var dæmdur til 75 klukkustunda samfélagsvinnu.

„Ég hélt því hver ég var leyndur í mjög langan tíma. Það kom virkilega í bakið á mér þegar ég var handtekinn,“ segir hann einnig í heimildamyndinni.

„Fólk hafði aldrei séð mynd af mér nema sem Pee-Wee Herman. Og allt í einu var komin Charlie Manson-fangamynd af mér. Ég missti stjórn á nafnleysi mínu. Það var átakanlegt,“ segir hann.

„Ég kom út úr skápnum og svo fór ég aftur inn í hann,“ segir Reubens. „Það er hneykslandi hvað fólk hugsar hræðilega ljóta hluti um mig.“ Málið væri enn stór neðanmálsgrein í lífi hans.

Í heimildamyndinni greindi Reubens meðal annars frá því að áður en hann varð frægur sem Pee-Wee Herman hafi hann verið í sambandi með manni sem hét Guy og var frá Echo Park í Los Angeles. Mikið af töktum og frösum Guy hafi verið innblástur að helstu einkennum Herman. Guy hafi síðan dáið úr AIDS.

Nektarmyndir komu honum aftur í klandur

Reubens lenti aftur í vandræðum þegar lögreglan í Los Angeles gerði húsleit á heimili hans og gerði gríðarlegt magn eigna Reubens upptækt. Þar á meðal voru 70 þúsund kitsch minjagripir og tugir mynda sem lögreglan skilgreindi sem barnaklám. 

Reubens var ákærður fyrir vörslu kynferðislegs efnis sem sýndi barn undir 18 ára aldri. Hann neitaði fyrir að efnið væri klám, hann væri safnari ýmiss konar erótísks efnis, þar á meðal vöðvatímarita og antík-nektarmynda, sumar hverjar yfir hundrað ára gamlar. Reubens sagði myndirnar ekki fela í sér neitt klámfengt þó þær væru af ungum mönnum.

Ákæran var látin niður falla í mars 2004 gegn því að Reubens játaði á sig minniháttar klámbrot. Var honum gert að tilkynna sig næstu þrjú árin hjá lögreglu og var bannað að vera einn í kringum börn.