Segja for­mann fræðslu­nefndar hafa brotið siða­reglur

Leikskólastjóri leikskólans Ársala hefur sagt upp vegna málsins. Kristófer Már segir sjálfsagt að láta reyna á það hvort þátttakan sé brot á siðareglum. Hann leyfi sér að setja á „foreldrahattinn“ utan nefndarfunda.

Reið og sár

Í opnu bréfi til sveitarstjóra og sveitarstjórnar Skagafjarðar segjast þau upplifa reiði, vonbrigði og sárindi vegna ákvörðunar formannsins sem hefur auk þess að taka þátt í stefnunni tjáð sig um það opinberlega. 

„Búið er að leggja mikla vinnu í að efla starfsanda og bæta starfsaðstæður í leikskólum Skagafjarðar en með þessari ákvörðun er út um þá vinnu,“ segir í opna bréfinu sem birt hefur verið á fréttasíðunni Feyki.

Um er að ræða Kristófer Már Maronsson en hann skrifaði grein á Vísi fyrr í vikunni þar sem hann svaraði formanni Félags leikskólakennara sem hafði sagt kæruna aðför að kennurum barna þeirra foreldra sem stæðu að kærunni. Kristófer svaraði honum og sagði það ekki rétt. Stefnan snerist um réttinn til verkfalls og hvernig þeim rétti er beitt.

Sýni afstöðu formannsins til leikskólans

„Það að einstaklingur í hans stöðu skuli velja að vera einn af þeim fáu sem völdu að stefna KÍ sýnir berlega hver afstaða hans til leikskólans er. Hann hafði val um að láta aðra um að leita til dómstóla í ljósi þess að hann er formaður fræðslunefndar en valdi að taka þátt með sérhagsmuni að leiðarljósi,“ segir í opnu bréfi félagsfólksins.

Þá segir að þessi ákvörðun hans hafi þegar haft þær afleiðingar að leikskólastjórinn í leikskólanum Ársölum hefur sagt upp. Í bréfinu segir að fleiri kennarar íhugi nú stöðu sína.

„Það verður lítið um faglegt leikskólastarf ef það verða engir kennarar eftir til að kenna börnunum. Mjög erfiðlega hefur gengið að manna leikskólana í Skagafirði. Ef fleiri uppsagnir koma í kjölfar ákvörðunar formanns fræðslunefndar þá myndu þær leiða til þess að leikskólarnir geta ekki haldið öllum deildum opnum með tilheyrandi afleiðingum. Við teljum að ákvörðun hans hljóti að vera brot á siðareglum kjörinna fulltrúa þ.e. að formaður fræðslunefndar skuli hafa valið sérhagsmuni fram yfir almannahagsmuni,“ segir í bréfinu.

Þá hvetja þau að lokum sveitarfélagið til að taka afstöðu með kennurum og reyna að koma í veg fyrir meiri skaða.

Miður að upplifun starfsfólks sé með þessum hætti

Kristófer Már segir sjálfur í svari til fréttastofu um málið að hann styðji kjarabaráttu kennara og að staða innan stéttarinnar kalli á breytingar. Hann segir miður að kennarar upplifi þátttöku hans í stefnunni sem árás á sig og þeirra störf.

„Ég hef tekið það fram áður að í því felast ekki ásakanir um að KÍ eða kennarar hafi haft nokkurn ásetning um að brjóta lög með verkfallsaðgerðum sínum. Með þátttöku í málsóknarfélaginu eru foreldrar með engu að gera lítið úr starfi leikskólakennara, því starfi sem fer fram á leikskólum eða mikilvægi leikskólans sem fyrsta skólastigsins. Það er mjög miður ef það er upplifun starfsfólks. Hver og einn á samt sem áður rétt á sinni eigin upplifun,“ segir Kristófer Már í svari sínu.

Heimilt að hafa foreldrahattinn utan funda

Hann segir þó eðlilegt að telji starfsfólk traust á milli hans og þeirra nú rofið sé eðlilegt að eiga samtal og það sé eðlilegt að þau láti á það reyna hjá sveitafélaginu hvort þátttaka hans sé brot á siðareglum.

„Ég hef ekki skrifað undir neitt sem formaður fræðslunefndar í Skagafirði í tengslum við málsóknina enda lít ég svo á að mér sé heimilt að hafa foreldrahattinn á utan nefndarfunda og annarra viðburða þar sem ég kem fram sem kjörinn fulltrúi. Mér þótti þó rétt, í ljósi þess að ég starfa í umboði íbúa sveitarfélagsins, að stíga fram og greina frá minni aðkomu að málinu. Heiðarleiki og hreinskilni skipta máli í fari kjörinna fulltrúa. Hver sem er getur lesið pistil sem ég birti á Vísi fyrir helgi og ætla ég ekki að fjalla frekar um hann hér,“ segir Kristófer Már.

Hann segist líta svo á að það séu sérhagsmunir þegar einhver skarar eld að eigin köku en það sé honum dulið hverjir hans sérhagsmunir séu í þessu máli.

„Í þessu samhengi velti ég einnig fyrir mér hverjir séu almannahagsmunir. Hvort það séu almannahagsmunir að það sé yfir allan vafa hafið að farið sé að lögum eða hvort líta eigi framhjá þeim vafa í ljósi góðs málstaðar og sýna málstaðnum skilyrðislausan stuðning? Þá velti ég einnig fyrir mér almannahagsmunum í tengslum við verkfall í leikskóla og þá sérstaklega fyrir þau börn og fjölskyldur þar sem lítið má út af bregða. Að sjálfsögðu eru einnig almannahagsmunir að samið sé við stéttir sem eru í kjaradeilum og ég vona að samningar náist sem fyrst í kjaradeilu kennara. Ég fór fyrst og fremst í þessa vegferð sem foreldri en vil þó minnast á það að í okkar góða samfélagi eru börn, kennarar og foreldrar og eigi að draga hlutverk mitt sem formanns fræðslunefndar inn í umræðuna þá hlýt ég að eiga að starfa í þágu allra hagaðila. Hvernig sem fer í því dómsmáli sem um ræðir mun ég áfram styðja baráttu kennara fyrir bættum kjörum,“ segir hann að lokum.

Svarið í heild sinni má sjá hér að neðan.

Ég vil byrja á því að ítreka að ég styð kennara í baráttu sinni fyrir bættum kjörum. Augljóst er að framboð af menntuðum kennurum er langt undir eftirspurn og það kallar á breytingar á ýmsum þáttum, þ.a.m. kjörum.

Mér þykir miður að kennarar upplifi það sem árás á sig og sín störf að ég skuli hafa ákveðið að taka þátt í málsóknarfélagi til að láta reyna á lögmæti verkfalls. Ég hef tekið það fram áður að í því felast ekki ásakanir um að KÍ eða kennarar hafi haft nokkurn ásetning um að brjóta lög með verkfallsaðgerðum sínum. Með þátttöku í málsóknarfélaginu eru foreldrar með engu að gera lítið úr starfi leikskólakennara, því starfi sem fer fram á leikskólum eða mikilvægi leikskólans sem fyrsta skólastigsins. Það er mjög miður ef það er upplifun starfsfólks. Hver og einn á samt sem áður rétt á sinni eigin upplifun.

Ég hef átt frábært samstarf við leikskólakennara og stjórnendur undanfarið ár og er bæði þakklátur fyrir að fá að taka þátt og stoltur af þeim verkefnum sem við höfum unnið að, m.a. sem felur í sér að bæta starfsaðstæður í leikskólunum. Telji starfsfólk að það traust sem ríkt hefur okkar á milli sé nú rofið þætti mér eðlilegt fyrsta skref að eiga samtal þar sem fólki gefst færi á að spyrja hvort annað spjörunum úr.

Varðandi siðareglur kjörinna fulltrúa sem fjalla um ákvarðanir og störf í þágu sveitarfélagsins þykir mér sjálfsagt að á það sé látið reyna hvort ég hafi gerst brotlegur við þær. Ég hef ekki skrifað undir neitt sem formaður fræðslunefndar í Skagafirði í tengslum við málsóknina enda lít ég svo á að mér sé heimilt að hafa foreldrahattinn á utan nefndarfunda og annarra viðburða þar sem ég kem fram sem kjörinn fulltrúi. Mér þótti þó rétt, í ljósi þess að ég starfa í umboði íbúa sveitarfélagsins, að stíga fram og greina frá minni aðkomu að málinu. Heiðarleiki og hreinskilni skipta máli í fari kjörinna fulltrúa. Hver sem er getur lesið pistil sem ég birti á Vísi fyrir helgi og ætla ég ekki að fjalla frekar um hann hér.

Ég lít á það sem svo að sérhagsmunir séu þegar einhver skarar eld að eigin köku. Það er mér dulið hverjir eru mínir sérhagsmunir í þessu máli. Í þessu samhengi velti ég einnig fyrir mér hverjir séu almannahagsmunir. Hvort það séu almannahagsmunir að það sé yfir allan vafa hafið að farið sé að lögum eða hvort líta eigi framhjá þeim vafa í ljósi góðs málstaðar og sýna málstaðnum skilyrðislausan stuðning? Þá velti ég einnig fyrir mér almannahagsmunum í tengslum við verkfall í leikskóla og þá sérstaklega fyrir þau börn og fjölskyldur þar sem lítið má út af bregða. Að sjálfsögðu eru einnig almannahagsmunir að samið sé við stéttir sem eru í kjaradeilum og ég vona að samningar náist sem fyrst í kjaradeilu kennara. Ég fór fyrst og fremst í þessa vegferð sem foreldri en vil þó minnast á það að í okkar góða samfélagi eru börn, kennarar og foreldrar og eigi að draga hlutverk mitt sem formanns fræðslunefndar inn í umræðuna þá hlýt ég að eiga að starfa í þágu allra hagaðila.

Hvernig sem fer í því dómsmáli sem um ræðir mun ég áfram styðja baráttu kennara fyrir bættum kjörum.