Til­hugsun um kyn­líf á ný ó­bæri­leg

Við höfum flest gengið í gegnum ástarsorg en vissulega er mjög misjafnt hvernig við upplifum hana. Nú veit ég lítið um sambandið eða hvernig það endaði en margt getur valdið aukinni vanlíðan í kjölfar sambandsslita. Það að hafa upplifað svik eða skyndileg sambandsslit getur gert það að verkum að þú þurfir lengri tíma til að jafna þig. Síðan getur það verið mjög sárt að fylgjast með fyrrverandi á samfélagsmiðlum, hvað þá ef hann er kominn í nýtt samband eða farinn að deita!

Þegar við höfum nýverið gengið í gegnum sambandsslit er ekki skrítið að viðvörunarkerfið innra með okkur fari í gang við það eitt að hugsa um nýjar tengingar. Það hljómar eins og viðvörunarkerfið þitt sé að spyrja þig: „Ertu alveg viss? Þetta endaði ekki vel síðast.“

Í langtímasambandi er kynlíf oftast með manneskju sem við treystum og okkur líður vel með. Kynlíf með nýju fólki sem við þekkjum lítið eða ekkert veitir ekki endilega sama öryggið eða sömu nándina. Það gæti verið gott að staldra við og skoða hvort þú þurfir að byggja fyrst upp traust og tengingu við manneskju áður en þú stundar kynlíf með viðkomandi. 

Til er hugtak sem nær utan um það þegar nauðsynlegt er að tengjast manneskju tilfinningalega áður en kynferðislegur áhugi kviknar. Hægt er að lesa sér til um demisexual ef það er eitthvað sem þér finnst passa.

Hér koma almenn ráð sem vonandi nýtast þér við að koma þér af stað aftur:

Gefðu þér tíma! Það liggur ekkert á að byrja að deita eða stunda kynlíf. Stundum dettum við í samanburð við fyrrverandi, eða aðra, og förum að setja pressu á okkur. 

Pressa er ekki sexí.. hvort sem við setjum hana á okkur sjálf eða ef aðrir gera það.

Byrjaðu smátt. Þegar viðvörunarkerfið fer í gang er mikilvægt að leyfa því ekki að stjórna ferðinni heldur taka lítil skref til að ögra! Þá er gott að taka skref sem þurfa ekki að leiða neitt lengra. Til dæmis spjall, daður eða að mynda augnsamband við einhvern sem þú laðast að!

Sennilega koma allskonar hugsanir upp! Hvað ef þessi særir mig? Hvað ef þetta klikkar? Það að deita getur verið allskonar en það er mikilvægt að leyfa ekki þessum hugsunum að stýra ferðinni eða ákveða hlutina fyrir fram. Taktu eftir hugsuninni og haltu svo þínu striki.

Eitt sem er gott að hafa á bakvið eyrað. Þegar þú skoðar þín fyrri sambönd tekur þú eftir einhverju mynstri? Stundum löðumst við að fólki sem kemur ekki vel fram við okkur eða er ekki tilfinningalega til staðar fyrir okkur. Það er mjög mikilvægt að vera meðvitaður um þetta og vinna í því að brjóta þetta mynstur upp. Prófaðu að deita einhvern sem er mjög ólíkur öllum þínum fyrri mökum.

Ef illa gengur að róa viðvörunarkerfið er gott að skoða málin aðeins dýpra. Að vera óöruggur er eðlilegt en með tímanum ætti að draga úr því óöryggi eftir því sem þú ferð oftar inn í þær aðstæður sem þú óttast. Talaðu við einhver sem þú treystir um þessa líðan.

Ef eitt leiðir að öðru og þú ert allt í einu farinn að spjalla við einhvern er mikilvægt að ræða það hversu hratt þú ert tilbúinn að fara. Gefðu þér svigrúm til að taka hlutina rólega. Frekar en að finnast þú strax þurfa að vera tilbúinn í nánd og kynlíf má líka fara hægt og byggja upp tilhlökkun og spennu!

Það að byrja að deita aftur eða kynnast fólki upp á nýtt er mjög berskjaldandi. Mörg tengja við það að erfitt getur verið að fara aftur af stað eftir sambandsslit og er þá mikilvægt að gefa sér tíma og rými til að vinna úr fyrri reynslu. Mátt líka skoða hvort það henti þér betur að fara hægt og tengjast fólki áður en þú ferð að stunda kynlíf með því!

Gangi þér vel <3