Dagvöruvísitala verðlagseftirlitsins hefur hækkað um 0,22 prósent milli mánaða en ef nýjustu gögn eru skoðuð, sem undanskilja afsláttardaga heilsudaga í Nettó, og mælist hækkunin þá 0,62 prósent.
„Það er mögulegt að þetta sjáist ekki í vísitölu Hagstofunnar bara út af því að það var afsláttarvika í Nettó í byrjun mánaðarins. Að henni lokinni sjáum við að það er svolítil hækkun,“ segir Benjamín Julian, verkefnastjóri verðlagseftirlits ASÍ.
Tilbúnir réttir, sælgæti og fuglakjöt rífa vísitöluna upp
Á síðasta árinu hefur mest hækkun mælst í nóvember, þegar um fimmtungur vöruflokka hækkaði í verði.
„Núna erum við að tala um undir tíu prósent. Þannig að þetta er ekki á jafn breiðum grunni, sem er fínt. Það þýðir að þetta er ekki jafn almennt. Það er verra tilfelli ef það er almennari hækkun.“
Þeir vöruflokkar sem vega hæst í hækkun vísitölunnar eru tilbúnir réttir, sælgæti og fuglakjöt. Þá hækkar verð á innfluttum osti í Krónunni og tómatar í lausu hækkuðu um 63 prósent milli mánaða í Bónus. Verð á ávöxtum lækkar hins vegar.
„Ef fólk er að reyna að halda áfram heilsudögunum frá janúar þá er hægt að gera það þarna, skipta út sælgætinu fyrir ávexti,“ segir Benjamín.
Skoða hvort innistæða sé fyrir hækkunum
Það skjóti skökku við að á tímum sem þessum, þar sem samfélagið í heild er að leggja sig allt fram um að lækka verðbólgu, að vöruverð skuli vera hækkað.
„Það er eitthvað þjóðarsport að tilkynna hækkanir í janúar og líta svo á að í hvert skipti sem laun hækka, þó það sé um jafn lága prósentu og núna að það þurfi að fleyta því beint inn í vöruverðið. Við munum skoða það á ársreikningum fyrirtækja hvort það sé innistæða fyrir því eða hvort fólk sé að gera þetta til að skara meiri eld að eigin köku,“ segir Benjamín.
