Viðskipti innlent

Efnt til nýrrar loðnuleitar í kapp­hlaupi við tímann

Kristján Már Unnarsson skrifar
Frá loðnuveiðum í Faxaflóa. Skipverjar á Guðrúnu Þorkelsdóttur SU búnir að draga nótina upp að skipshlið.
Frá loðnuveiðum í Faxaflóa. Skipverjar á Guðrúnu Þorkelsdóttur SU búnir að draga nótina upp að skipshlið. KMU

Hafrannsóknastofnun og útgerðir loðnuskipa hafa ákveðið að efna til nýrrar loðnuleitar, þeirrar fjórðu frá áramótum. Þetta er sérstök aukaleit í von um að finna meiri loðnu og verður lagt af stað á tveimur skipum frá Austfjarðahöfnum strax í kvöld.

„Það verður farið á tveimur skipum að austan í kvöld, Polar Ammassak og Aðalsteini Jónssyni,“ segir fiskifræðingurinn Guðmundur J. Óskarsson, sviðsstjóri uppsjávarsviðs Hafrannsóknastofnunar.

Tveir vísindamenn frá Hafrannsóknastofnun verða um borð í hvoru skipi. Leitin mun einkum beinast að hafsvæðum út af Vestfjörðum og vestanverðu Norðurlandi.

Þéttleiki loðnu, eins og hann mældist í nýafstaðinni loðnuleit dagana 8.-19. febrúar. Árni Friðriksson er sýndur ljósblár, Polar Ammassak grænn og Heimey rauð.Hafrannsóknastofnun

„Markmiðið er að dekka í stórum dráttum sama svæði og Árni Friðriksson fór yfir fyrr í mánuðinum norðvestan til. Það á sem sagt að kanna hvort meira af hrygningarloðnu á leið til hrygningar hafi bæst við að norðan inn á svæðið. Stefnan er á að reyna að klára verkefnið áður en spáð óveður á föstudeginum skellur á,“ segir Guðmundur.

Spurður hvort einkum sé verið að leita að hugsanlegri vestangöngu svarar fiskifræðingurinn:

„Þetta beinist að loðnu sem mun annaðhvort ganga vestur fyrir landið eða jafnvel inn að norðurströndinni til hrygningar.“

Guðmundur Óskarsson fiskifræðingur er sviðsstjóri uppsjávarsviðs Hafrannsóknastofnunar.Einar Árnason

Miklir fjárhagslegir hagsmunir eru undir að hægt verði að veiða meiri loðnu áður en hún hrygnir og drepst. Sá takmarkaði kvóti, sem gefinn var út fyrir helgi, er vart nema hálfur farmur fyrir helming flotans en er samt talinn geta skilað um eins milljarðs króna útflutningstekjum.

Í fréttum Stöðvar 2 í gærkvöldi mátti sjá loðnu landað í Vestmannaeyjum í gærmorgun til heilfrystingar hjá Vinnslustöðinni:

Íslenskar útgerðir fengu úthlutað um 4.600 tonna loðnukvóta síðastliðinn fimmtudag, eins og fjallað var um í þessari frétt:

Loðnuveiðar Sjávarútvegur Efnahagsmál Vestmannaeyjar Fjarðabyggð Langanesbyggð Vopnafjörður Múlaþing Sveitarfélagið Hornafjörður Akranes

Tengdar fréttir

„Minnstu loðnuvertíð sögunnar að ljúka“

„Að öllu óbreyttu, þ.e.a.s. ef ekki verður gefinn út viðbótarkvóti er minnstu loðnuvertíð sögunnar að ljúka,“ segir í tilkynningu Vinnslustöðvarinnar um loðnuveiðar sem hafa farið fram síðan atvinnuvegaráðherra gaf út kvóta síðastliðinn fimmtudag.

Örkvóti í loðnu gæti skilað milljarði í útflutningstekjur

Hafrannsóknastofnun tilkynnti í dag að loðnustofninn hefði mælst nægilega sterkur til að óhætt væri að heimila veiðar, en þó mjög takmarkaðar. Kvótinn, sem ráðherra gaf út síðdegis, gæti skilað yfir einum milljarði króna í útflutningstekjur.

Árstekjur starfsmanna lækkuðu um fimmtung vegna loðnubrests

Launagreiðslur Vinnslustöðvarinnar í Vestmannaeyjum og íslenskra dótturfélaga drógust saman um tuttugu prósent á milli áranna 2024 og 2023. Stærsta og í raun eina skýring þessa mismunar er loðnubrestur ársins 2024.



Mest lesið


Fleiri fréttir

Sjá meira


×

Mest lesið