Vilja hvalkjöt af matseðlinum

Jakob Bjarnar skrifar 26. febrúar 2025 10:35

Bubbi, Aníta, Edda og Björgvin eru meðal listamanna sem skrifa undir. Vísir/Vilhelm

Fjöldi þjóðþekktra einstaklinga, listamanna og annarra, hafa skrifað undir áskorun sem beinist að veitingamönnum, áskorun þess efnis að þeir taki hvalkjöt af matseðli sínum.

Þetta kemur fram í tilkynningu sem Vala Árnadóttir formaður hvalavina sendir frá sér. Þar segir að 140 manns hafi tekið höndum saman og skori á veitingahús sem bjóða upp á hvalkjöt að láta af því; „stíga inn í framtíðina og taka hvalkjöt af matseðli. Ef engin er eftirspurnin þá eru forsendur til að veiða heldur engar.“

Í bréfi sem fylgir undirskriftunum, sem er stílað á starfsfólk og stjórnendur, segir að þær séu ýmsar sögur sem við segjum okkur sem þjóð, sögur markaðar af seiglu og stjálfstæði í jafnvægi við náttúruöflin.

„Ísland sem mótað er af eld og ís, hefur aldrei veigrað sér frá framþróun. Þegar gamlir siðir þjóna engum tilgangi lengur er rétt að láta af þeim. Við höfum verndað hálendið okkar. Við höfum verndað árnar okkar. Við fögnuðum hreinum orkulindum þegar aðrar þjóðir notuðu áfram kol.“

Vala Árnadóttir hvalavinur lætur ekki deigan síga og beinir nú spjótum að veitingamönnum. Hún vill banna hvalveiðar og dregur þá ályktun að ef engin sé eftirspurnin sé sjálfhætt.vísir/vilhelm

En nú erum við stödd á vendipunkti, segir í bréfinu:

„Hvalveiðar eiga sér enga framtíð á Íslandi. Hvalveiðar eru barn síns tíma, tíma þegar fólk tók umhugsunarlaust það sem þurfti frá náttúrunni í þeim tilgangi að lifa af. Við erum ekki lengur stödd í þeim veruleika. Við erum framsýn þjóð. Þjóð sem hlustar á vilja fólksins, visku hafsins og hljóðu raddir hvalanna sem hafa borið þjóðsögur okkar undir öldunum í gegnum aldirnar. Meirihluti landsmanna hefur talað: Íslendingar vilja ekki hvalveiðar. Það er kominn tími til að sleppa takinu af óþarfa siðum sem ekki lengur þjóna neinum tilgangi.“

Listamennirnir segja að þeir vilji því biðja veitingamenn, sem „nærið okkur og þau sem vilja heimsækja fallega landið okkar - að velja rétt, að velja í anda lands og þjóðar. Að velja framtíðina, þar sem hafið býr yfir fjölbreyttu og ríkulegu lífríki í stað dynjandi óms sprengiskutuls.“

Í bréfinu segir þá að flestir veitingastaðir hafi nú þegar tekið það skref að taka hvalkjöt af matseðlinum.

„Þetta skref hefur verið tekið í takt við gildi íslensku þjóðarinnar, virðingu fyrir náttúrunni og hafinu. Með því að taka þetta skref er engu tapað, heldur þvert á móti, hafa þessir staðir öðlast traust þeirra sem vilja vera réttu megin í sögunni.“

Listamennirnir segja valið veitingamannanna og skora á þá að vera með sér í liði, fyrir haf og þjóð. Undir skrifa eftirtaldir: