Fann­ey Inga og fé­lagar unnu stór­sigur í sænska bikarnum

Häcken vann þá 7-1 sigur á Vittsjö í fyrsta leik liðanna í riðlakeppni sænska bikarsins. Hver riðill er með fjögur lið þar sem efsta liðið tryggir sér sæti í undanúrslitunum.

Fanney Inga spilaði allan leikinn með Häcken en fékk á sig mark á 71. mínútu. Þá var staðan orðin 4-0 fyrir Häcken.

Staðan var 2-0 í hálfleik eftir mark frá Monicu Jusu Bah og sjálfsmark.

Matilda Nildén og Felicia Schröder komu Häcken í 4-0 og Nildén skoraði síðan sitt annað mark í leiknum og kom Häcken í 5-1.

Novalie Jensen og Alexandra Larsson skoruðu tvö síðustu mörkin í uppbótatíma.

Fanney Inga er á sínu fyrsta tímabili með Häcken en hún kom til liðsins frá Val.