Fótbolti

Sagði höfuðið í lagi en tekur enga sénsa með Glódísi stríðs­konu

Sindri Sverrisson skrifar
Glódís Perla Viggósdóttir í baráttunni við Alexöndru Popp á föstudaginn, vel vafin um höfuðið eftir höggið sem hún fékk í upphafi leiks.
Glódís Perla Viggósdóttir í baráttunni við Alexöndru Popp á föstudaginn, vel vafin um höfuðið eftir höggið sem hún fékk í upphafi leiks. Getty/Oryk Haist

Glódís Perla Viggósdóttir hefur í fyrsta sinn á sínum atvinnumannsferli misst af leik vegna meiðsla og gæti mögulega misst af leik Bayern gegn Lyon í kvöld í einvígi liðanna í 8-liða úrslitum Meistaradeildar Evrópu. Hún ku ekki glíma við höfuðmeiðsli.

Eftir að hafa misst af leik við Köln fyrir rúmri viku, vegna óþæginda í hné, átti Glódís mjög góðan leik í 3-1 sigrinum gegn Wolfsburg og fékk hrós frá þjálfara sínum eftir leik. 

Hún spilaði hins vegar aðeins rúmar fimmtíu mínútur í leiknum en það var þó ekki vegna höfuðhöggsins sem hún fékk og blóðgaðist vegna, snemma leiks, eftir árekstur við markvörðinn Ena Mahmutovic.

„Hún er mjög mikilvægur leikmaður fyrir okkur“

„Þetta [skiptingin á 53. mínútu] hafði ekkert með neinn svima að gera,“ sagði Alexander Straus, hinn norski þjálfari Bayern, eftir leikinn á föstudaginn. Verkur í hné virðist hafa valdið því að Glódís var tekin af velli og sagði Straus „stríðskonuna hafa spilað í gegnum sársauka“:

„Hún fann fyrir þessu í hálfleik en reyndi samt að halda áfram. Eftir nokkrar mínútur ákváðum við þó að taka hana af velli því við vildum ekki taka neina áhættu,“ sagði Straus og var þá eflaust með leikinn við Lyon í kvöld í huga.

„Ég vona að hún geti spilað gegn Lyon en við tökum enga sénsa. Hún er mjög mikilvægur leikmaður fyrir okkur. Við sjáum til,“ sagði Straus á föstudaginn.

Fyrri leikur Bayern og Lyon er í Þýskalandi í kvöld en liðin mætast svo á miðvikudagin í næstu viku í Frakklandi.

Lyon er sigursælasta lið í sögu keppninnar, með átta titla, og franska liðið vann alla sex leiki sína í riðlakeppninni, þar á meðal báða leikina við Wolfsburg, lið Sveindísar Jane Jónsdóttur. Bayern vegnaði einnig vel en endaði þó í 2. sæti síns riðils eftir 3-2 tap á útivelli gegn Arsenal í lokaumferðinni.




Fleiri fréttir

Sjá meira


×