Jón Haukur ráðinn svæðis­stjóri Ceedr

Í fréttatilkynningu þess efnis segir að Jón Haukur hafi mikla reynslu í sölu- og markaðsmálum á Íslandi og í Bandaríkjunum og hafi verið í framlínu markaðsmála fyrir Icelandair á Íslandi og í Bandaríkjunum , Byko, Marel, Icelandic Glacial í Bandaríkjunum og Coca-Cola á Íslandi. Jón Haukur sé með MBA gráðu frá Háskólanum í Reykjavík og BA gráðu í auglýsinga-og markaðsfræði frá London College of Communications.

Ceedr sé hinn stafræni armur Pipar\TBWA sem sérhæfi sig í notkun stafrænna leiða í sölu- og markaðssetningu fyrir fyrirtæki þvert yfir Norðurlöndin og í Evrópu. Einnig sé Ceedr vottaður þjónustuaðili Hubspot og aðstoði fyrirtæki við uppsetningu og innleiðingu á Hubspot og hanni jafnframt vefsíður inn í það kerfi.

„Jón Haukur er mikill fengur fyrir Ceedr því hann er reynslubolti úr okkar geira. Þekking og reynsla hans nýtist bæði viðskiptavinum Ceedr og Pipar\TBWA gríðarlega vel og er hann öflug viðbót í stjórnendateymi okkar,“ er haft eftir Hreggviði S. Magnússyni, framkvæmdastjóra Ceedr um ráðninguna.

„Að fá tækifæri til að taka þátt í þeirri vegferð sem Ceedr er á þykir mér virkilega spennandi. Stofan hefur mjög sterkan grunn og hjá henni starfar fjölbreyttur hópur starfsfólks sem kemur víðsvegar að úr heiminum og býr yfir mikilli þekkingu. Umsvifin eru að aukast jafnt og þétt hér á landi og á hinum Norðurlöndunum og það verður spennandi að fá tækifæri til þess að leggja mín lóð á vogarskálarnar,“ er haft eftir Jóni Hauki.