Ó­trú­leg endur­koma hjá City í sjö marka leik

Manchester City vann ótrúlegan 5-2 endurkomusigur á Crystal Palace í fyrsta leik dagsins í ensku úrvalsdeildinni.

City lenti 0-2 undir en kom til baka og vann þriggja marka sigur. Með honum komst liðið upp í 4. sæti deildarinnar. Palace er í 11. sætinu en tapið í dag var fyrsta tap liðsins síðan 15. febrúar.

Framan af var allt í blóma hjá Palace. Eberechi Eze kom gestunum yfir á 8. mínútu með skoti af stuttu færi og á 21. mínútu jók Chris Richards muninn í 0-2 þegar hann skallaði hornspyrnu Adams Wharton í netið.

Kevin De Bruyne minnkaði muninn fyrir City á 33. mínútu með skoti beint úr aukaspyrnu og þremur mínútum síðar jafnaði Omar Marmoush. Egyptinn hefur skorað sex mörk í tíu deildarleikjum síðan hann kom til City frá Frankfurt í janúar.

Strax í upphafi seinni hálfleiks kom Mateo Kovacic City yfir eftir sendingu frá De Bruyne.

Heimamenn héldu áfram að hamra járnið meðan það var heitt og á 56. mínútu slapp James McAtee inn fyrir vörn gestanna eftir langa sendingu markvarðarins Edersons. Hann skoraði og kom City í 4-2.

Nico O'Reilly kláraði svo leikinn endanlega þegar hann skoraði fimmta mark City á 79. mínútu. Þetta var hans fysta mark í ensku úrvalsdeildinni.