Fórnar banda­rískum háskólapartýum til að ná á toppinn

Gunnlaugur Árni fór yfir málin með Aroni Guðmundssyni í viðtali í Sportpakkanum á Stöð 2 sem sjá má hér að neðan.

Gunnlaugur Árni hefur verið meðal allra bestu kylfinga í háskólagolfinu í vetur og það þrátt fyrir að vera á sínu fyrsta ári. Hann hefur til að mynda unnið eitt mót og fjórum sinnum endað í hópi þriggja efstu, og þannig náð bestum árangri nýliða á keppnistímabilinu.

Þá hefur hann auðvitað rokið upp heimslista áhugakylfinga og er í langbesta sæti sem Íslendingur hefur náð, núna í 36. sæti.

Jákvætt umtal varðandi árangur þessa bráðefnilega kylfings er mikið en hann reynir að hugsa sjálfur ekki mikið út í það.

„Þetta er náttúrulega mikil vinna sem kemur á undan því að ná svona árangri. Það er gaman að sjá þetta vera að skila einhverju,“ segir Gunnlaugur Árni.

„Þessa dagana er minn leikur mjög góður. Mér líður mjög vel. Sjálfstraustið er hátt. Ég þarf bara að halda áfram að leggja tíma í þetta, æfa vel og vera tilbúinn í hvert einasta mót,“ bætir hann við en næsta mót er The Invitational at the Ford í dag og á morgun.

Aðspurður um skemmtanalífið í háskólanum og hvort að partýstandið sé líkt og það er teiknað upp í bandarískum bíómyndum segir Íslendingurinn:

„Ég persónulega fer bara í tíma og úr tíma. Ég eyði eiginlega engum tíma á „campusnum“ nema þegar ég þarf þess. Við æfum bara mjög vel og gerum í raun og veru ekki mikið meira en það.

Þetta er svipað og þú getur ímyndað þér úr bíómyndunum, um hvernig venjulegur háskóla-campus er. Þetta er bara steríótýpan þaðan.“ Tekur hann þá ekki þátt í partýunum?

„Við sjáum þau eiginlega ekki neitt. Við erum mjög metnaðarfullt lið og stefnum langt,“ segir Gunnlaugur Árni enda ætlar hann sér að keppa við þá allra bestu í framtíðinni:

„Ég er ekkert að fela markmiðið. Það er að verða atvinnumaður á stærstu mótaröðunum; PGA eða Evrópumótaröðinni. Það er mjög góð leið að fara í gegnum háskólagolfið.“