Cecilía örugg um silfrið eftir sigur í borgarslagnum

Sigurinn þýðir að Inter mun enda í 2. sæti deildarinnar en liðið er núna með 48 stig eftir 24 leiki, sjö stigum á eftir meisturum Juventus og jafnframt sjö stigum á undan Roma sem getur mest fengið sex stig í viðbót. AC Milan endar í 5. sæti en liðið er með 34 stig.

Hin bosníska Marija Milinković kom Inter yfir í grannaslagnum í dag en AC Milan tókst að jafna með sjálfsmarki á 27. mínútu.

Elisa Polli kom Inter yfir að nýju á 59. mínútu og á lokakaflanum skoraði Tessa Wullaert, lærimey Elísabetar Gunnarsdóttur úr belgíska landsliðinu, tvö mörk og innsiglaði sigur Inter.

Cecilía, sem er 21 árs, er nú að ljúka sinni fyrstu heilu leiktíð sem aðalmarkvörður í atvinnumennsku, eftir að hafa farið frá Fylki til Bayern München árið 2021 og verið strax lánuð þaðan til Örebro í Svíþjóð í eitt ár. Hún varði mark varaliðs Bayern en glímdi einnig mikið við meiðsli áður en hún var svo lánuð til Inter fyrir þessa leiktíð.

Hjá Inter hefur Cecilía slegið í gegn og átt stóran þátt í því ekkert lið hefur fengið nálægt því eins fá mörk á sig í ítölsku deildinni í vetur, eða aðeins 23 í 24 leikjum.

Í viðtali við Vísi í byrjun þessa mánaðar kvaðst Cecilía enn eiga eftir að taka ákvörðun um framhaldið hjá sér. Hún ætti ár eftir af samningi sínum við Bayern.