Viðskipti innlent

Margrét hættir sem for­stjóri Nova

Magnús Jochum Pálsson skrifar
Margrét Tryggvadóttir hefur verið forstjóri Nova í sjö ár.
Margrét Tryggvadóttir hefur verið forstjóri Nova í sjö ár. Nova

Margrét Tryggvadóttir, forstjóri Nova, hefur óskað eftir að láta af störfum eftir sjö ár í forstjórastól og 18 ár hjá félaginu. Hún mun gegna starfinu áfram til 1. desember og sinna ráðgjöf fyrir félagið eftir að hún lætur af störfum.

Þetta kemur fram í tilkynningu til Kauphallar.

„Það hefur verið mér einstök gæfa að fá að taka þátt í þessari mögnuðu vegferð Nova – að fá að vaxa og dafna með frábæru fólki og eiga þátt í að gera Nova að því sem það er í dag,“ sagði Margrét í tilefni af tilkynningunni.„Allt hefur sinn tíma og nú tel ég réttan tíma til að hefja nýjan kafla – fyrir mig og fyrir Nova.“

Margrét segir ákvörðuninni ekki hafa verið auðvelda en maður þurfi að þora, skora á sjálfan sig og halda áfram að vaxa.

„Framtíð Nova er björt og titlarnir munu halda áfram að koma eftir mína tíð – alveg eins og hjá Liverpool. Ég er ekki farin, ég er virkur hluthafi, hækkum í tónlistinni, höfum gaman og sigrum leikinn!“ sagði hún jafnframt.

Drifkraftur í uppbyggingu Nova frá fyrsta degi

Í tilkynningunni segir að Margrét skilji við Nova í stöðugum og traustum vexti. Afkoma fyrsta ársfjórðungs 2025 sýni áframhaldandi tekjuvöxt, sterkan EBITDA vöxt og öflugt sjóðstreymi.

„Margrét hefur verið drifkraftur í uppbyggingu og árangri Nova frá fyrsta degi. Leiðtogastíll hennar, áræðni og mannlegur tónn hefur skapað fyrirtækjamenningu sem við öll erum stolt af. Hún skilur við félagið í sterkri stöðu, með öfluga stefnu og frábært teymi til framtíðar,“ segir Sigríður Olgeirsdóttir, stjórnarformaður Nova, í tilefni af brotthvarfi Margrétar.

„Við í stjórninni þökkum henni af einlægni fyrir ómetanlegt framlag og fögnum áframhaldandi samstarfi í nýju hlutverki,“ segir Sigríður jafnframt.






Fleiri fréttir

Sjá meira


×