Vó að æru Margeirs með því að færa hann til í starfi

Málið varðar breytingu á störfum Margeirs sem voru gerðar árið 2023.

Í dómi Héraðsdóms Reykjavíkur segir að fyrir liggi í málinu að Margeir hafi átt í ástarsambandi við rannsóknarlögreglukonu sem var undirmaður hans sem hafi staðið yfir í stutta hríð, frá haustinu 2022 til áramóta þetta sama ár. Í lok árs 2022 hafi þessi kona kvartað til yfirlögregluþjóns yfir óþægilegri hegðun af hálfu Margeirs.

Í febrúar 2023 hafi málið verið leyst með óformlegum hætti og þau sammælst um að „leggja spilin á borðið“ og geta unnið saman aftur. Í byrjun mars hafi hún svo formlega tilkynnt um áreitni af hálfu Margeirs. Hún hafi óskað þess að málið yrði tekið alvarlega og að brugðist yrði hratt við. Hún sagði að málið hefði haft „gífurleg áhrif á líðan hennar í vinnunni og utan hennar“. Þá gæti hún ekki mætt meðan hann væri í vinnunni.

Degi síðar hafi Margeir verið upplýstur um kvörtunina, sem er sögð hafa varðað ítrekaðar skilaboðasendingar hans til hennar þrátt fyrir að hún hefði beðið hann um að senda sér ekki.

Ekki tilefni til að saksækja

Fyrirtæki var fengið til að gera úttekt á málinu. Og lá mat þess fyrir í lok maí þetta sama ár. Niðurstaða þess var að konan hefði ítrekað orðið fyrir áreitni af hálfu Margeirs. Í tíu af tólf tilfellum sem voru til skoðunar mætti skilgreina háttsemi Margeirs sem ofbeldi. Minnst var á áðurnefndar skilaboðasendingar sem og óboðinni heimsókn hans til hennar.

Lögreglustjórinn tilkynnti héraðssaksóknara um hugsanlega refisverða háttsemi Margeirs. Það var þó mat saksóknara að ekki væri tilefni til að hefja rannsókn, og málinu því vísað frá.

Áminntur og færður í annað starf

Margeir hafði farið í veikindaleyfi eftir að málið kom upp, en í byrjun júlímánaðar hafði hann, samkvæmt læknisvottorði, náð fullri starfshæfni. Lögreglustjórinn hins vegar sagði vinnuframlag hans afþakkað á meðan kvörtun konunnar væri til meðferðar.

Um haustið var Margeiri veitt áminning í starfi fyrir að hafa farið yfir mörk undirmanns síns á meðan og eftir að ástarsamband þeirra stóð yfir. Og þá tók lögreglustjórinn ákvörðun um að breyta störfum hans og verksviði. Þar var sérþekkingar hans krafist, en hann var ekki lengur yfirmaður deildar eins og áður. Breytingin hafði ekki áhrif á launakjör hans.

Mánuðina á eftir kvartaði Margeir og setti út á þessar ákvarðanir. Lögreglustjórinn sagðist standa við þær í svörum til hans.

Einelti og ofbeldi í hans garð

Í ágúst í fyrra fór Margeir í veikindaleyfi. Hann tiltók að framkoma æðstu stjórnenda lögreglunnar hefði valdið honum miklum þjáningum og vanlíðan. Vegna þess treysti hann sér ekki til að mæta til vinnu.

Hann höfðaði svo málið sem héraðsdómur hefur nú dæmt í. Hann lét dómsmálaráðherra vita af málarekstrinum og sagðist upplifa sig jaðarsettan í störfum sínum, og eftir að hann höfðaði málið hefði ástandið versnað. Um væri að ræða einelti og ofbeldi í hans garð. Ráðuneytið kannaði málið en virðist hafa tekið ákvörðun um að aðhafast ekki.

Vegið að æru Margeirs

Í niðurstöðu héraðsdóms segir að lögreglustjóranum hefði verið kleift að láta Margeir sinna sams konar störfum og hann hafði áður gengt án þess að hann yrði áfram yfirmaður konunnar.

Ákvörðun lögreglustjórans hefði brotið í bága við lög, en hún hefði verið meira íþyngjandi en nauðsyn bar til þrátt fyrir að launakjör Margeirs hefðu ekki verið skert.

Í dómnum segir að þó að Margeir hafi sýnt af sér ósæmilega háttsemi í garð undirmanns væri fallist á það að ákvörðunin um að færa hann til í starfi hafi verið meiðandi. Ákvörðunin hafi vegið að æru og persónu hans. Því féllst dómurinn á að ríkið skyldi greiða honum miskabætur.

Margeir krafðist einnig miskabóta vegna upplýsingagjafar lögreglustjórans til fjölmiðla um málið. Dómurinn féllst ekki á það.

Niðurstaða dómsins var sú að ákvörðun lögreglustjórans yrði felld úr gildi, og að ríkið myndi greiða Margeiri tvær milljónir í miskabætur og 1,6 milljónir í málskostnað.