Hótar Evrópu­sam­bandinu og App­le háum tollum

Yfirlýsingarnar í dag eru enn einn viðsnúningurinn á stefnu Bandaríkjastjórnar frá því að hún lagði fyrst háa innflutningstolla á flest ríki heims í vor. Hún lagði tuttugu prósent tolla á vörur frá Evrópusambandinu frá 2. apríl en lækkaði þá um helming fram til 8. júlí til þess að viðræður gætu átt sér stað á milli evrópskra og bandarískra ráðamanna. Tollar á evrópskt stál, ál og varahluti í bíla námu hins vegar 25 prósentum.

Nú vill bandaríski forsetinn meina að þessar viðræður hafi ekki skilað neinum árangri og því ætli hann að „leggja til“ að fimmtíu prósent tollar taki gildi eftir rúma viku, 1. júní. Endurtók hann gamlar ásakanir sínar um að Evrópusambandið hefði verið stofnað til þess að klekkja á Bandaríkjunum.

Þá hótaði forsetinn því að leggja 25 prósent toll á Apple-vörur sem eru framleiddar utan Bandaríkjanna. Það virðast viðbrögð við ákvörðun tæknirisans um að halda framleiðslu á Iphone-símum sínum áfram í Asíu.