Sigurður Jökull stýrir Cruise Iceland

Í tilkynningu segir að á aðalfundi Cruise Iceland, sem haldinn var 30. apríl, hafi ný stjórn verið skipuð en þar hafi þau Gunnar Tryggvason hafnarstjóri Faxaflóahafna og Unnur Elva Arnardóttir forstöðumaður hjá Skeljungi bæst við en Unnur Elva var jafnframt kjörinn formaður Cruise Iceland. Varaformaður samtakanna er eftir sem áður Emma Kjartansdóttir fyrir hönd Iceland Travel en í stjórninni sitja einnig Íris Jóhannsdóttir fyrir hönd Gáru, Jóhanna Tryggvadóttir fyrir hönd Hafnarsamlags Norðurlands, Aðalheiður Borgþórsdóttir fyrir Hafnir Múlaþings og Blængur Blængsson fyrir Samskip.

Varamenn í stjórn eru Hilmar Lyngmo hafnarstjóri hjá Höfnum Ísafjarðarbæjar, Örlygur Hnefill Örlygsson fyrir Hafnir Norðurþings og Hafsteinn Garðarsson hafnarstjóri Grundarfjarðarhafnar.

„Fyrsta verkefni sem aðalfundur fól nýrri stjórn var því ráðning framkvæmdastjóra samtakanna sem fyrst og einhentu formaður og varaformaður samtakanna sér í það verkefni. Þann 5. maí auglýstu samtökin eftir framkvæmdastjóra og bárust margar umsóknir. Hæfustu umsækjendur voru teknir í viðtal og úr þeim hópi valdi stjórn Cruise Iceland Sigurð Jökul Ólafsson, fyrrverandi stjórnarformann félagsins í hlutverkið. Þar réðu úrslitum, ekki aðeins þekking hans úr fyrra starfi sem Markaðsstjóri Faxaflóahafna og reynsla hans sem stjórnarformaður Cruise Iceland, heldur einnig stuðningur innlendra sem erlendra aðildarfélaga Cruise Iceland.“

Nýr framkvæmdastjóri mun taka til starfa í ágúst og verður skrifstofa samtakanna til húsa í Húsi atvinnulífsins í Borgartúni 35.

Einnig segir að á aðalfundi hafi ennfremur verið samþykktar mikilvægar breytingar á skipulagi samtakanna sem fögnuðu 20 ára afmæli í fyrra. 

„Breytingarnar fela í sér áætlun um fjölgun félagsmanna enda hagaðilar skemmtiferðaskipa mjög fjölbreyttur og stór hópur sem undanfarin misseri hefur áþreifanlega orðið var við hve hagsmunagæsla samtakanna er mikilvæg. Fyrirkomulagi félagsgjalda hefur einnig verið breytt með það fyrir augum að gera minni aðilum auðveldara að taka þátt í starfi samtakanna á sama tíma og búinn er til farvegur fyrir leiðandi hagaðila innan geirans, þ.e. þau fyrirtæki sem bera hitann og þungann af málefnum skemmtiferðaskipa á Íslandi,“ segir í tilkynningunni.