Sakaður um viljandi á­rekstur: „Bara séð svona í leikjum og go-kart“

Það voru þrír hringir eftir þegar bílar Verstappens og Russells rákust saman, eftir að Verstappen hafði verið búinn að fá skilaboð um að hann ætti að hleypa Russell fram úr, eins og sjá má hér að neðan.

Verstappen fékk tíu sekúndna refsingu sem sendi hann úr fimmta sæti niður í aðeins tíunda sæti.

Verstappen fékk auk þess þrjú refsistig. Hann er nú kominn með ellefu refsistig á tólf mánuðum og er því einu refsistigi frá því að fara í bann í eina keppni. Tvö af þessum refsistigum renna út í lok júní en það eru enn tvær keppnir eftir fram að því.

„Ég var eins undrandi og þið. Ég hef séð svona aðferðir áður í hermileikjum og í go-kart en aldrei í Formúlu 1,“ sagði Russell við fjölmiðla eftir keppnina í dag.

„Á endanum náðum við fjórða sæti en hann endaði í tíunda. Ég veit ekki hvað var eiginlega að fara í gegnum huga hans. Manni fannst þetta viljandi hjá honum, svo þetta kom á óvart,“ sagði Russell.

Sjálfur hafði Vestappen engan áhuga á að ræða málið. „Skiptir það máli?“ Ég vil frekar ræða keppnina en eitthvað eitt atvik,“ svaraði hann spurður hvort að um viljaverk hefði verið að ræða.

„Max er magnaður ökumaður og það líta svo margir upp til hans. Það er algjör synd að svona hlutir séu ítrekað að gerast. Þetta virðist algjör óþarfi og þetta virðist aldrei vera honum til tekna,“ sagði Russell.

Verstappen fékk því aðeins eitt stig í dag en Russell tólf. Það voru hins vegar McLaren ökumennirnir sem komu fyrstir í mark.

Oscar Piastri vann sigur og er nú með 186 stig á toppnum í stigakeppni ökuþóra en Lando Norris er næstur með 176 stig. Verstappen er svo þriðji með 137 stig en Russell með 111.

Eins og gefur að skilja er McLaren með yfirburði í keppni bílaframleiðenda, með 362 stig, en Ferari er næst með 165 stig og Mercedes með 159. Red Bull, lið Verstappens, er svo í 4. sæti með 144 stig.