Fyrir­liði og fram­tíðar­maður fram­lengja í Kefla­vík

Halldór Garðar er 28 ára gamall, 188 sentimetra bakvörður, lykilmaður hjá Keflavík og fyrirliði liðsins. Hann skoraði 10 stig, gaf 2.6 stoðsendingar og greip 2.3 fráköst að meðaltali í leik á síðasta tímabili.

Hilmar Pétursson er 25 ára gamall, 190 sentimetra bakvörður. Bróðir Sigurðar sem er einnig í Keflavík og sonur Péturs, fyrrum þjálfara liðsins sem lét af störfum um áramótin. Hilmar kom til Keflavíkur í fyrra eftir tvö tímabil í atvinnumennsku með Baskets Munster í næstefstu deild Þýskalands.

„Það er afar ánægjulegt að ná samningum við Halldór og Hilmar. Halldór hefur verið burðarás í liðinu og Hilmar er leikmaður sem við höfum mikla trú á að geti tekið stórt skref fram á við með okkur,“ segir formaðurinn Magnús Þorsteinsson í tilkynningu körfuknattleiksdeildar Keflavíkur.

„Halldór Garðar er reynslumikill og traustur leikmaður sem hefur verið fyrirliði liðsins síðustu ár. Hann hefur sýnt mikla leiðtogahæfileika bæði innan vallar sem utan og verður áfram lykilmaður í uppbyggingu liðsins á komandi tímabilum.

Hilmar á eftir að kemur sterkur inn í vetur og á eftir að gegna mikilvægu hlutverki í liði félagsins. Hann átti við þrálát meiðsli að stríða síðasta tímabíl en kemur tvíefldur inn“ segir einnig í tilkynningunni.

Spila undir stjórn Daníels Guðna

Daníel Guðni Guðmundsson var á dögunum ráðinn þjálfari körfuboltaliðs Keflavíkur til næstu tveggja ára. Hann tók við starfinu af Sigurði Ingimundarsyni og Jóni Halldóri Eðvaldssyni sem leystu Pétur Ingvarsson af seinni hluta síðasta tímabils. Keflavík endaði í áttunda sæti deildarinnar og var sópað út úr úrslitakeppninni af Tindastóli.