Um­ræða um bókun 35 taki ekki tíma frá öðrum málum

Alþingi kom saman í dag til að ræða frumvarp um bókun 35 sem hefur nú verið á dagskrá í um sextíu klukkustundir í annarri umræðu. Þingfundir fara afar sjaldan fram á sunnudegi og varð ákvörðun forseta Alþingis þar um þrætuepli meðal þingmanna í dag.

Þingfundinum var frestað á sjöunda tímanum í kvöld.

Þingfundir á sunnudegi eru afar fátíðir, en fundurinn í dag var sá þriðji á þessari öld.

Á dagskrá var frumvarp utanríkisráðherra um bókun 35 en hún var í raun lítið rædd, mestallur tíminn fór í að ræða fundarstjórn forseta, og var hún rædd í marga klukkutíma.

Þar fordæmdi minnihlutinn að þing hafi verið kallað saman á sunnudegi á meðan meirihlutinn sakaði minnihlutann um málþóf varðandi bókun 35.

Í klippunni hér að neðan má heyra brot úr nokkrum ræðum:

Verið að semja um stór mál

Fundur á sunnudegi hvers vegna var þessi fundur mikilvægur á þessum degi?

„Já ég held það sé nú kannski mikilvægt að hafa í huga að við erum búin að vera hérna með stutt þing síðastliðna mánuði frá því ný ríkisstjórn tók við, og mörg stór og góð mál hafa farið í gegnum þingið,“ segir Guðmundur Ari.

Nú standi lokafasi þingsins yfir og verið sé að semja um stór mál.

„Þá er bara mikilvægt að funda vel ef það er umræðuþörf.“

Þingflokksformenn hafi fundað í dag og samtalið færist alltaf nær og nær samkomulagi hvað þinglok varðar.

Málið geti alveg beðið

Bergþór Ólason segir að eðlilega hafi minnihlutinn gert athugasemd við að þingfundur hefði verið haldinn á sunnudegi, enda sé ekkert neyðarástand uppi.

„Þetta mál hefur beðið í rúma þrjá áratugi og það getur alveg beðið aðeins áfram.“

Þá séu samtöl í gangi við aðra þingflokksformenn sem vonandi miði að því jafnt og þétt að þinglok geti náðst með forsvaranlegum hætti.