Miður sín eftir að hann keyrði yfir dýr í miðri keppni

Hamilton var búinn að aka tólf hringi í kappakstrinum í Montreal í gær þegar hann keyrði yfir múrmeldýrið, sem er stórt nagdýr af íkornaætt og kallast „groundhog“ á ensku.

Hamilton endaði í 6. sæti en Ferrari-liðið áætlar að hann hafi tapað um hálfri sekúndu á hring vegna skemmda á bílnum við það að keyra yfir dýrið.

BBC segir að Hamilton sé bæði vegan og þekktur dýravinur, og hafi því haft minni áhyggjur af úrslitum keppninnar en „skelfilegum“ dauðdaga dýrsins.

„Það hafði gengið nokkuð vel fram að þessu en svo, ég sá það ekki gerast, en augljóslega heyrði ég að ég hafði keyrt á múrmeldýr. Svo það var algjörlega niðurdrepandi. Ég elska dýr og ég er svo sorgmæddur yfir þessu. Þetta var skelfilegt. Ég hef aldrei upplifað svona áður,“ sagði Hamilton og bætti við:

„Það er aldrei gaman að sjá svona lagað gerast. Ég vona bara að dýrið hafi ekki þurft að þjást.“

Það var George Russell á Mercedes sem hafði sigur og vann sína fyrstu keppni á tímabilinu en ríkjandi meistarinn Max Verstappen varð í 2. sæti. Liðsfélagi Russells hjá Mercedes, Kimi Antonelli, komst í fyrsta sinn á verðlaunapall og varð í 3. sæti.

Oscar Piastri varð í 4. sæti og er stigahæstur með 198 stig. Lando Norris klessti utan í Piastri, liðsfélaga sinn hjá McLaren, og varð að hætta en er í 2. sæti stigakeppninnar með 176 stig.

Verstappen er með 155, Russell 135 og Charles Leclerc er í 5. sæti með 104 stig. Hamilton er svo í sjötta sætinu með 79 stig.