Stað­festa sam­bands­slitin

Sögusagnir hafa verið uppi síðustu mánuði um að samband þeirra Perry og Bloom væri á enda, en bandarískir fjölmiðlar vísa í sameiginlega yfirlýsingu þeirra í gær þar sem þau staðfesta sambandsslitin.

Þau Perry og Bloom hafa verið saman síðan 2016 og trúlofuðust fyrir sex árum síðan.

„Þau munu halda áfram að sjást saman sem fjölskylda þar sem forgangsatriði þeirra verður að ala upp dóttur sína með ást, stöðugleika og gagnkvæma virðingu að leiðarljósi,“ segir í yfirlýsingunni.

Ennfremur segir að yfirlýsingin hafi verið send út vegna „mikils áhuga og samtala“ varðandi samband þeirra.

Hin fertuga Perry og hinn 48 ára Bloom hættu saman árið 2017 en byrjuðu svo saman aftur skömmu síðar og trúlofuðust svo á Valentínusardeginum 2019. Ári síðar opinberaði Perry að hún væri með barni í tónlistarmyndbandinu við lagið Never Worn White. Dóttir þeirra, Daisy Dove, kom svo í heiminn í ágúst 2020.

Perry, sem var áður gift bandaríska grínistanum Russell Brand, sló í gegn árið 2008 með laginu I Kissed a Girl, en meðal annara smella hennar eru Roar, California Gurls, Wide Awake og Firework.

Leikarinn Orlando Bloom, sem var áður giftur áströlsku fyrirsætunni Miröndu Kerr og á með henni fjórtán ára dreng, sló í gegn í kvikmyndunum um Hringadróttinssögu, en hefur einnig leikið í myndum á borð við Pirates Of The Caribbean og Hobbitanum.