Taka á­kvörðun um Glódísi á leikdag

Glódís varð að játa sig sigraða vegna erfiðrar magakveisu í leiknum við Finnland á miðvikudaginn, og lék aðeins fyrri hálfleik. Hún var hins vegar mætt á æfingu í dag en tók ekki fullan þátt:

„Við eigum eftir að sjá í sjálfu sér hvernig viðbrögðin í líkamanum verða. Hvernig hún sefur og hvort það verða einhver eftirköst. Ákvörðunin verður tekin um hádegi á morgun,“ sagði Þorsteinn.

„Hún kláraði ekki alla æfinguna í dag. Við létum hana ekki klára fulla æfingu. Vildum hlífa henni við mestu átökunum en sjá hvernig líkaminn brygðist við. Við erum bjartsýn og svo sjáum við til hvernig kvöldið og nóttin verða, og hvernig hún verður í fyrramálið þegar hún vaknar,“ sagði Þorsteinn á blaðamannafundi sem nú stendur yfir.

Plan A er að Glódís spili

Staðan hefur sífellt verið að batna, varðandi Glódísi:

„Fyrsti sólarhringurinn var mjög erfiður en svo hefur þetta verið smám saman upp á við. Jákvæð þróun. Hún keyrði sig gjörsamlega út og þurrkaði allt upp, það voru mikil átök fyrir líkamann að spila þessar 45 mínútur og hún gerði allt sem mögulegt var. Hægt og bítandi að lagast og alla vega nógu góð til að taka einhvern þátt í æfingu í dag. A-planið er að hún spili og svo er líka Plan B. Við erum klár í allt,“ sagði Þorsteinn en að öðru leyti eru allir leikmenn tilbúnir að spila á morgun:

„Það hefur ekkert smit komið og það eru allir leikmenn heilir og klárir í leikinn á morgun.“

Leikur Sviss og Íslands hefst klukkan 19 annað kvöld, að íslenskum tíma, eða klukkan 21 að staðartíma.