Ein­kunnir Ís­lands: Fátt að frétta

Úrslitin eru augljóslega mikil vonbrigði fyrir íslenska liðið sem fellur úr leik á mótinu. Tvö mörk Svisslendinga seint í síðari hálfleik innsigluðu örlög liðsins sem bíður enn sigurs á Evrópumóti frá árinu 2013.

Glódís Perla var best íslensku leikmannana í kvöld og Sandra María Jessen var einnig öflug en einmana fremst á vellinum.

Einkunnir liðsins má sjá að neðan.

Cecilía Rán Rúnarsdóttir, markvörður [6]

Öryggið uppmálað í sínum aðgerðum. Reyndi ekkert gríðarlega mikið á hana en sinnti sínu vel þegar á þurfti að halda. Gat lítið gert í góðri afgreiðslu af stuttu færi.

Guðný Árnadóttir, hægri bakvörður [5]

Fer meidd af velli eftir rúmlega hálftímaleik og tókst ekki að setja mark sitt á leikinn.

Glódís Perla Viggósdóttir, miðvörður [6]

Búin að ná sér af veikindunum og leiddi íslenska liðið í dag. Munar mikið um að hafa einn besta varnarmann heims í liðinu, bæði gæðanna og leiðtogahæfileikanna vegna. En það dugði skammt.

Ingibjörg Sigurðardóttir, miðvörður [5]

Fékk gult snemma leiks og maður óttaðist aðeins stöðuna. Komst nokkuð vel frá sínu og vörn íslenska liðsins hélt vel. Átti skot í slá snemma leiks en leikurinn hefði farið á annan veg væri boltinn örlítið neðar. Létur spila sig út í marki Svisslendinga.

Guðrún Arnardóttir, vinstri bakvörður [6]

Færist yfir í hægri bakvörð eftir meiðsli Guðnýjar. Sinnti sínu varnarlega en uppspilið ekkert stórkostlegt. Erfitt þó að setja út á varnarmenn Íslands hvað uppspilið varðar þegar uppleggið er greinilega að þeir sparki langt. Átti stórkostlega tæklingu og bjargaði marki undir lokin.

Alexandra Jóhannsdóttir, miðjumaður [5]

Komst ekki nægilega mikið í boltann en gerði sitt vel þegar reyndi á. Fulllangir kaflar þar sem miðjumenn Íslands komast ekki í boltann vegna uppleggsins.

Dagný Brynjarsdóttir, miðjumaður [4]

Svipað og með Alexöndru. Var dugleg og gerði sitt, en þurfti oft að fylgjast með löngum boltum fara yfir sig eða framhjá sér beint upp í efstu línu. Missir boltann klaufalega í marki Svisslendinga og gefur þeim aftur skyndisókn seinna í leiknum.

Karólína Lea Vilhjálmsdóttir, miðjumaður [5]

Fékk dauðafæri á 73. mínútu eftir langt innkast Sveindísar Jane en hitti boltann ekki. Skapaði ekki mikið og var mismikið í boltanum líkt og aðrir miðjumenn Íslands.

Agla María Albertsdóttir, hægri vængmaður [4]

Kom inn í byrjunarliðið fyrir Hlín en komst ekki í mikinn takt við leikinn. Var lítið í boltanum og skapaði ekki mikið fram á við.

Sandra María Jessen, framherji [6] - Maður leiksins

Dugleg í pressunni og sinnti sínu vel í fremstu línu. Dugleg að elta langa bolta sem fóru hist og her. Fítonskraftur í Söndru sem smitaði út frá sér, lagði meira í þennan leik en flestir í íslenska liðinu. Ein og yfirgefin stóran hluta leiksins en hélt alltaf áfram og skilaði heldur betur sínu í kvöld en vantaði upp á aðstoðina við hana.

Sveindís Jane Jónsdóttir, vinstri vængmaður [4]

Þurfti að sinna mikilli varnarvinnu við að elta Iman Beney í hvert einasta sinn sem hún fór upp. Virtist þá vanta upp á kraftinn sóknarlega á móti. Kom ekki nægilega mikið út úr henni í kvöld.

Varamenn:

Sædís Rún Heiðarsdóttir kom inn á fyrir Guðnýju Árnadóttur á 33. mínútu. [5]

Gerði sitt í bakverðinum en engin stjörnuframmistaða. Stóð fyrir sínu stærstan part.

Hafrún Rakel Halldórsdóttir kom inn á fyrir Öglu Maríu Albertsdóttur á 67 . mínútu. [5]

Kom inn af krafti og ógnaði meira en Agla María hafði gert á 67 mínútum þar á undan.