Veltir því upp hvort eig­endum hafi verið refsað fyrir að tjá sig

Mbl.is greindi frá því í dag að bakaríið Hygge hefði enn ekki fengið leyfið afhent. Í samtali við Vísi í síðasta mánuði sá Axel Þorsteinsson eigandi Hygge fyrir sér að geta opnað bakaríið þann 24. júní, en þá hafði hann beðið í rúma tvö hundruð daga eftir leyfinu. 

Fyrirtækið hafi orðið fyrir gríðarlegu tekjutapi meðan á biðinni hefur staðið og keypt Brauðhúsið í Grímsbæ til að geta haldið framleiðslu á matvælunum áfram til að fyrirtækið færi ekki á hausinn. 

Heilbrigðiseftirlit, ekki heilbrigðisforvarnir

Einari Bárðarsyni framkvæmdastjóra Sveit rann kalt vatn milli skinns og hörunds í morgun þegar hann las tíðindin. Hann ræddi málið í Reykjavík síðdegis. 

„Ef rekstraraðili er í rekstrarstöðvun í 230 daga útaf leyfismálum, og gerði kannski ráð fyrir að vera í sex vikur, þá er allur rekstrargrundvöllur farinn undir þessa starfsemi. Hann er eiginlega gjaldþrota áður en hann fer í loftið,“ segir Einar.

Það er varla ásetningur?

„Nei en það er eitthvað að. Maður leyfir sér að efast um að fólk fari í vinnuna með það hugarfar að koma í veg fyrir að aðrir geti farið í vinnuna. Það gengur ekki upp. Í nafninu er það heilbrigðiseftirlit, en ekki heilbrigðisforvarnir.“

Fókusinn áður á öðru

Í samtali við fréttastofu í síðasta mánuði sagði Einar að veitingamenn óttist sumir að styggja viðkomandi stofnanir eða stjórnsýslu sem hafa umsókn þeirra til meðferðar.

„Svo fannst manni það, er ástæða fyrir því að óttast þetta svona? Er þetta ekki full dramatískt? Svo sér maður fyrirtæki sem fer í opinbera umræðu til að opna á umræðuna, og fjórum vikum seinna er búið að útiloka það frá því að opna veitingastað á þessum stað. Nota bene þar sem það var veitingastaður, í húsi sem var teiknað með veitingastað í kjallaranum í huga. En strandar núna á því, ef maður skilur fréttaflutning rétt, að það þurfi að vera sorp frá veitingastað fyrir aftan húsið,“ segir Einar.

Það megi líta svo á að ákvörðun eigenda Hygge um að ræða opinberlega um mál þeirra hafi fellt það. 

„Það leit þannig út, þú getur sett það fram þannig, nema ef einhver getur sagt okkur að það sé einhvern veginn öðruvísi.“

Einar segir málið ekki hafa snúist um sorp fyrr en eigendur Hygge fóru að heyra í sér. Axel, eigandi Hygge, sagði í samtali við fréttastofu á sínum tíma að leyfisveitingin strandaði einna helst á tveimur gifsveggjum sem ákveðið var að reisa inni í bakaríinu. 

„Fókusinn á málinu var allt annars staðar í húsinu þar til þetta varð. Þetta er búið að fara í gegnum ýmis stig þangað til,“ segir Einar.