Biden hraunar yfir Clooney: „Hann má fokka sér“

Í viðtali við fjölmiðlamanninn og grínistann Andrew Callaghan á YouTube-rásinni Channel 5 drullaði Hunter Biden yfir Clooney og aðra flokksmenn sem gagnrýndu fyrrverandi forsetann opinberlega eftir brösuglega frammistöðu hans í kappræðum við Donald Trump, nú Bandaríkjaforseta, síðasta sumar. 

„Hann má fokka sér. Hann má fokka sér. Hann má fokka sér og allir í kringum hann,“ sagði Hunter Biden í viðtalinu, sem var birt á mánudag, þegar hann var spurður út þátt Clooneys í þeirri atburðarás sem leiddi til þess að Biden dró sig úr forsetaframboði og Kamala Harris gerðist forsetaefni Demókrata.

Það kann að birtast nokkrum lesendum spánskt fyrir sjónir að Hollywood-leikari hafi getað haft svo mikil áhrif á forsetakosningar í einu stærsta landi heims en auk þess að vera bíóstjarna er George Clooney áhrifamaður innan Demókrataflokksins og hefur skipulagt fjölda fjáröflunarviðburða fyrir flokkinn.

Clooney var meðal fyrstu þungavigtarmanna í flokknum til að lýsa því opinberlega yfir að þeir vildu að Biden drægi sig úr framboði vegna slæmrar heilsu og elli. Gerði Clooney það í kjölfar þess að hafa hitt Biden á fjáröflunarviðburði, þar sem Biden kannaðist ekki einu sinni við Clooney þrátt fyrir tæplega tveggja áratuga vinskap þeirra tveggja, eins og atvikinu er lýst í bókinni Original Sin, þar sem blaðamaðurinn Jake Tapper fjallar um kosningabaráttu Bidens.

„Ég þarf ekki að vera fokking kurteis,“ hélt Hunter Biden áfram. „Í fyrsta lagi er ég sammála Quentin Tarantino.... Fokking George Clooney er enginn fokking leikari. Hann er fokking, eins og... Ég veit ekki hvað hann er. Hann er vörumerki.“

Í kjölfar yfirlýsinga Clooney í skoðanagrein í New York Times í júní 2024 tóku fleiri í flokknum undir og Biden dró loks framboð sitt til baka og lýsti yfir stuðningi við Harris varaforseta sem tók við. Clooney þakkaði honum „fyrir að bjarga lýðræðinu enn og aftur“ og lýsti yfir stuðningi við Harris.

„Hvaða rétt hefur þú til að ganga á mann sem hefur gefið 52 ár af fokking lífi sínu til þjónustu við þetta land og ákveða að þú, George Clooney, ætlir að taka heila síðu í fokking New York Times,“ bætir Hunter Biden við í viðtalinu en hann nefndi einnig aðra áberandi persónur í flokknum; David Axelrod og David Plouffe sem stýrðu kosningabaráttu Barack Obama. Sá síðarnefndi sagði jafnvel að Biden hefði „gjörsamlega riðið okkur“ samkvæmt fyrrnefndri bók um kosningabaráttuna.

Hunter Biden fékk náðun frá föður sínum af fjölda ákæra á síðustu mánuðum embættistíðar Bidens en hann hefur nýlega komið aftur fram á sjónarsviðið á síðustu vikum til að gagnrýna meðferð Demókrataflokksins á kosningunum.

Fleira kom fram í viðtalinu við Callaghan. Til dæmis neitaði Hunter Biden að hafa innbyrt kókaín í Hvíta húsinu og hafnaði því að kókaínpoki sem fannst í Hvíta húsinu 2023 hafi verið sinn. Hann kvaðst hafa verið edrú síðan 2019. Trump sagði í viðtali að pokinn hafi annaðhvort verið í eigu Hunters eða Joe Bidens.

Biden kemur einnig í nýjum hlaðvarpsþætti Jaime Harrison, fyrrverandi formanns demókrataflokksins.

„Veistu, við munum berjast innbyrðis næstu þrjú ár þar til við finnum forsetaefni. Og þegar við höfum forsetaefni, þá skulum við styðja við það forsetaefni helvíti vel,“ sagði Hunter Biden við Harrison í þættinum At Our Table.