Fjöldi ferða­manna slíkur að rotþróin ræður ekki við það

Ingibjörg Dögg Kjartansdóttir ritstjóri Heimildarinnar ræddi neikvæðar hliðar fjöldaferðamennskunnar í Reykjavík síðdegis á Bylgjunni í gær en ferðamannaþreytu gætir enn meira á Íslandi. Í síðasta tölublaði Heimildarinnar er fjallað um ferðamannalandið Ísland sem Ingibjörg kallar í leiðara hið nýja Ísland.

Allt miðað við ferðamenn

Hún segir vandamál ferðamannaiðnaðarins fyrst og fremst stafa af því að stjórnvöld hafi veigrað því fyrir sér að setja ferðaþjónustunni skýran ramma vegna þess hve ört hún óx.

Sjá einnig: Á­gengir ferða­menn hafi sært syrgjandi Mýrdælinga

„Það sem ég upplifi mjög sterkt þegar ég ferðast um Ísland er að hér er að verða ákveðið rof á milli margra Íslendinga og svo ferðaþjónustunnar þar sem öll skilti eru á ensku, þjónusta er á ensku og afþreying miðar að ferðamönnum. Öll mótun umhverfisins er út frá ferðaþjónustu en ekki okkur sem búum hérna,“ segir Ingibjörg.

Hún segir einnig hafa myndast gjá milli hins almenna ferðamanns, íslensks og erlends, og þeirra sem eiga efni á að kaupa sér kyrrðina sem sé eitt helsta aðdráttaraflið í ferðamennskunni en hverfi hratt með örri fjölgun þeirra ferðamanna sem koma til landsins.

Þyrlur rjúfi hálendiskyrrðina

Ingibjörg tekur til dæmis Múlagljúfur þar sem ferðamaðurinn gat áður notið kyrrðarinnar og ósnortinnar náttúrunnar en nú sækja það yfir 120 þúsund ferðamenn á ári. Fólk eyði hundruðum þúsunda fyrir kyrrðina sem sé nú rofin af reglulegum hávaða þyrlna.

„Þetta er ör breyting á íslensku samfélagi sem er ekki endilega auðvelt að snúa við,“ segir Ingibjörg.

Hún segir samþjöppun einnig færast í aukana í ferðaþjónustunni.

„Langflest fyrirtæki í ferðaþjónustunni eru lítil og með tímanum mun þessum litlu fyrirtækjum fækka. Kynnisferðir er dæmi um fyrirtæki sem sameinaðist félagi sem sá um fjárfestingar í ferðaþjónustu fyrir lífeyrissjóði,“ segir hún.

Björgunarsveitir komi að útförum í Mýrdal

Umfjöllun Heimildarinnar um systkin sem stóðu í því að bola ágengum ferðamönnum burt frá útför föður þeirra hefur einnig vakið mikla athygli. Sýn hefur einnig fjallað um svipuð vandræði sem starfsmenn Hallgrímskirkju hafa þurft að glíma við.

„Ferðamennirnir voru þarna úti um allt eins og einhverjir álfar í lúpínunum,“ segir Ingibjörg um ferðamennina sem vildu komast inn í útförina í Vík.

Ágengi ferðamanna hafi ekki aðeins áhrif á helgihald Mýrdælinga heldur raunar alla anga lífsins þar.

„Fólk lýsir því að matvöruverslunin tekur mið af ferðamönnum og fólk á erfitt með að kaupa sér mat og fólk þarf að fara á Selfoss. Rotþróin ræður ekki við ferðamennina og stundum lyktar í bænum,“ segir Ingibjörg.

Hún segir að þó að ferðamenn séu mikilvægur iðnaður hér á landi verði að hafa það í huga að fyrir það gjöldum við á ýmsan hátt.

„Ferðamannaiðnaðurinn er mikilvægur og hefur verið mikilvægur fyrir okkar hagkerfi, sérstaklega eftir efnahagshrunið og svo heimsfaraldurinn, þess vegna held ég að stjórnvöld hafi veigrað því fyrir sér að setja reglur um þetta. En á endanum erum við að borga fyrir þetta með breytingum á samfélaginu og breytingum á náttúrunni,“ segir Ingibjörg.