„Mikið í gangi sem enginn veit af“

Hamilton sagði sjálfan sig vera „gagnslausan“ ökumann eftir að hafa verið sá tólfti hraðasti í tímatökunum fyrir ungverska kappaksturinn sem fór fram um helgina.

Hamilton náði ekki að vinna sig ofar og eftir kappaksturinn var hann beðinn um að útskýra ummælin frekar.

„Þegar þér líður á ákveðinn hátt, þá líður þér bara þannig. Það er mikið í gangi sem enginn veit af og er ekki gott“ sagði Hamilton við Sky Sports.

Hann tók skýrt fram að hann væri ekki búinn að missa ástríðuna fyrir Formúlunni en gat ekki lofað því að hann myndi snúa aftur þegar keppni hefst aftur eftir sumarfrí, síðustu helgina í ágúst.