Lax ofan Stuðlagils gæti hafa veiðst lengst frá sjó á Ís­landi

Í fréttum Sýnar var rifjað upp að með Kárahnjúkastíflu breyttist Jökla úr forugasta fljóti landsins í tæra bergvatnsá árið 2006. Þetta varð til þess að Þröstur Elliðason í Veiðiþjónustunni Strengjum hóf að rækta upp ána í samstarfi við bændur.

Þröstur segir að náttúrulegar aðstæður og uppeldisskilyrði seiða hafi reynst mun betri en menn héldu upphaflega. Þá hafi fylling Hálslóns með árlegu yfirfalli síðsumars á Kárahnjúkum ekki reynst sá skaðvaldur gagnvart seiðum sem menn óttuðust.

„Og nú er bara að vaxa upp stór og mikill laxastofn á svæðinu, sem var í upphafi með seiðasleppingum. Ég er að minnka þær og náttúran er að taka við. Og þetta er einn stærsti laxastofn landsins líklega í dag,“ segir Þröstur en fyrirtæki hans er leigutaki Jökulsár á Dal.

Hann segir að menn hafi verið að leita að laxi á Efri-Jökuldal langleiðina að bænum Brú á Jökuldal. Í gær hafi veiðst lax ofan Stuðlagils.

„Sem er alveg frábært,“ segir Þröstur.

Það var Skúli Björn Gunnarsson sem fékk laxinn um einn kílómetra ofan Stuðlagils og gæti hann verið sá sem veiðst hefur lengst frá sjó á Íslandi.

Þröstur segir að í loftlínu sé veiðistaðurinn um 75 kílómetra frá sjó. Laxinn gæti hafa gengið 80 til 90 kílómetra upp í ánni frá sjó.

„Ég veit ekki hvort það sé önnur á þar sem veiðst hefur lengra innanlands. Ég er ekki viss. En hugsanlega,“ segir Þröstur.

Helsti veiðisérfræðingur landsins, Eggert Skúlason, telur að lax hafi hugsanlega veiðst ofar í Stóru-Laxá í Hreppum. Það sé þó óvíst og erfitt að skera úr um það.

Útbreiðsla laxins í Jöklu vekur spurningar um hvort lax gæti jafnvel gengið alla leið upp á Hrafnkelsdal.

„Við erum svona hægt og rólega að vinna okkur upp Jökuldalinn,“ segir Þröstur. Ferlið hafi verið langt að átta sig á hvar hann sé. „Það er lax miklu víðar en við héldum.“

En það er einnig athyglisvert að á sama tíma og flestar laxveiðiár landsins valda vonbrigðum þetta sumarið er veiðin í Jöklu fjörutíu prósentum meiri en í fyrra.

„Það eru komnir eitthvað um 800 laxar. Það hafa verið svona 20 til 40 á dag. Ef við hefðum fengið að veiða í þrjá mánuði þá værum við að taka vel á annað þúsund laxa.

En við erum reyndar ennþá að veiða. Við erum byrjaðir að veiða núna í hliðaránum. Það eru komnir nokkrir laxar á land núna í morgun. Veiðimenn eru að tínast hérna inn. Ég er búinn að heyra af þremur fjórum löxum í hliðarám og bleikjum og sjóbirting. Þannig að menn eru eitthvað að veiða hérna í hliðaránum í Jöklu þar sem er alltaf tært.“

Hálslón fór á yfirfall í gær sem þýðir að mórautt jökulvatnið flæðir núna niður árfarveginn. Það var hins vegar stíflan sem gerði Jöklu að laxveiðiá.

„Venjulega hafa menn bölvað virkjunum – allt sem tengist laxveiði. En það er nú ekki kannski alveg hér.

Reyndar bölvum við yfirfallinu. Það mátti koma seinna. Það kemur yfirleitt í lok ágúst, eða seinnipart sumars.

En það er búið að vera heitt í sumar, því miður. Ég er eiginlega eini maðurinn sem bölvar hitanum,“ segir Þröstur og hlær í Sýnarviðtali sem sjá má hér:

Hér má heyra hvað bændur á Jökuldal sögðu fyrir sjö árum: