Öryggis­mynda­vélar í svefn­her­berginu og fyrsta út­gáfa af Lolitu á skrif­stofunni

Húsið í New York var eitt af fimm heimilum Epstein og þar safnaði hann í kringum sig þekktum og áhrifamiklum einstaklingum; stjórnmálamönnum, listamönnum og vísindamönnum. 

Hann hélt matarboð þar sem ólíklegustu einstaklingar komu saman og umkringdi sig með myndum af sjálfum sér og valdamiklum vinum sínum.

Þetta er meðal þess sem kemur fram í nýrri umfjöllun New York Times, sem hefur komist yfir myndir af heimili Epstein í New York og bréfum sem þekktir einstaklingar skrifuðu í tilefni 63 ára afmælis kynferðisbrotamannsins.

„Forvitni þinni eru engin  takmörk sett,“ sagði í bréfi frá Ehud Barak, fyrrverandi forsætisráðherra Ísrael, þar sem hann vísar til fjölbreytts kunningjahóps Epstein. „Fyrir mörgum þeirra ert þú sem lokuð bók en þú veist allt um alla.“

Leikstjórinn Woody Allen sagði matarboð á heimilinu minna á kasta Drakúla, „þar sem Lugosi heldur þrjár ungar kvenkyns vampírur til að sjá um staðinn“.

Heimili Epstein í New York var á sjö hæðum og taldi 1.950 fermetra. Á myndum sem New York Times hefur undir höndum má sjá hvernig brúður hangir á reipi í fordyrinu, uppstoppað tígrisdýr á skrifstofu húsráðanda og öryggismyndavélar í svefnherbergi hans.

Á skrifstofunni var einnig að finna fyrstu útgáfu af Lolitu eftir Vladimir Nabokov, um fullorðinn mann sem þróar með sér þráhyggju gagnvart 12 ára gamalli stúlku sem hann nauðgar ítrekað. 

Í sérstöku nuddherbergi var að finna myndir af nöktum konum og fjölda flaska af sleipiefni.

Fjöldi þolenda Epstein hefur greint frá því að myndvélar hafi verið að finna víðar um húsið og hafa lýst því hvernig auðjöfurinn greiddi þeim fyrir að nudda sig, áður en hann fróaði sér fyrir framan þær, misnotaði og jafnvel nauðgaði.

Miklar deilur ríkja nú í Bandaríkjunum, bæði í umræðunni og innan kerfisins, um birtingu gagna í tengslum við hinar ýmsu rannsóknir á Epstein. New York Times hefur fyrir sitt leyti ekki gefið upp hvaðan myndirnar sem miðillinn birti koma.

Athygli manna hvílir nú ekki síst á Ghislaine Maxwell, fyrrverandi samstarfskonu og kærustu Epstein, sem afplánar 20 ára dóm fyrir misnotkun og kynferðisbrot gegn ungum stúlkum. 

Hún var á dögunum færð úr alríkisfangelsi í lágmarks-gæslu fangelsi í Flórída, eftir að hafa rætt tvívegis við starfsmann dómsmálaráðuneytisins, sem einnig er fyrrverandi lögmaður Donald Trump Bandaríkjaforseta.

Maxwell er talin geta varpað ljósi á það sem fram fór á heimilum Epstein en hún hefur sett fram ýmsar kröfur gegn því að bera vitni fyrir þingnefnd og mótmælt birtingu vitnisburða sem fóru fram fyrir ákærukviðdómi áður en Epstein lést í fangelsi.