Ben kveður Jerry

„Ég hélt að ég myndi aldrei skrifa þetta, en eftir 47 ár hefur Jerry tekið þá erfiðu ákvörðun að stíga til hliðar í fyrirtækinu sem við byggðum upp saman,“ skrifar Ben Cohen, annar stofnandi Ben & Jerry's í færslu á Instagram.

Ben og Jerry láta hvorugir lítið fara fyrir sínum pólitísku skoðunum. Til að mynda studdu þeir við bakið á Black Lives Matter-hreyfingunni og árið 2021 sögðust þeir ætla að hætta að selja vörurnar sínar í Ísrael. Fyrr á þessu ári var Ben handtekinn eftir að hafa truflað fund þingnefndar öldungardeildar þar sem til umræðu var fjárstyrkur fyrir Ísraelsher.

Með færslunni fylgir tilkynning frá Jerry Greenfield þar sem hann segist ekki geta haft það á samviskunni að halda áfram að starfa fyrir fyrirtækið, sem nú er í eigu Unilever.

„Þetta er ein erfiðasta og sársaukafyllsta ákvörðun sem ég hef nokkurn tímann tekið,“ segir Jerry.

Ben & Jerry's var stofnað árið 1978 en árið 2000 keypti Unilever fyrirtækið. Stofnendurnir fengu að setja á fót sérstakt ráð sem sæi um vörumerki íssins sem samræmist hugmyndafræði þeirra. Samkvæmt NYT er ekki um algenga lausn að ræða en ætlunin var að stofnendurnir fengju að láta sína skoðun í ljós. Hins vegar hefur samstarfið farið versnandi og kærðu Ben og Jerry Unilever árið 2024 fyrir að reyna uppræta ráðið og koma í veg fyrir að þeir myndu kalla eftir vopnahléi á Gasa.

„Frá upphafi, trúðum ég og Ben að okkar gildi og leitin að réttlæti væru mikilvægari en fyrirtækið sjálft. Ef fyrirtækið gæti ekki staðið fyrir það sem við trúum á, þá væri ekki þess virði að reka fyrirtæki,“ segir Jerry.

Hann segir ráðið hafa verið beitt þöggun af móðurfyrirtækinu og hafi þeir ekki fengið tækifæri til að tjá sig um mál sem þeir vildu tjá sig um vegna ótta við að reita eigendurna til reiði. Jerry segir sjálfstæði þeirra ekki vera lengur til staðar og því geti hann ekki, samviskunnar vegna, starfað áfram hjá Ben & Jerry's.