Tekur marga milljarða með sér og gæti snúið aftur með öðru liði

Horner var látinn fara í sumar eftir tuttugu ár sem liðsstjóri Red Bull, en enginn hefur sinnt slíku starfi lengur. Ástæða brottrekstursins var ekki gerð opinber en hneykslismál tengd Horner og hegðun hans í garð starfsmanna blússuðu upp fyrir rúmu ári síðan. Þá átti hann í mjög stirðu sambandi við föður Max Verstappen.

Auk þess hefur árangur liðsins verið undir væntingum á þessu tímabili, Red Bull var langt á eftir McLaren þegar Horner var látinn fara en nýja liðstjóranum Laurent Mekies hefur tekist að brúa bilið aðeins, með góðri hjálp Max Verstappen sem hefur unnið síðustu tvær keppnir í Aserbaísjan og Ítalíu.

Red Bull tilkynnti svo í morgun, rúmum tveimur mánuðum eftir að Horner var rekinn, að starfslokasamningurinn væri nú að fullu frágenginn.

Breska ríkisútvarpið segir Red Bull hafa greitt Horner 52 milljónir punda, um átta og hálfan milljarð króna, við starfslok en The Times greinir frá því að hann hafi fengið 80 milljóna punda starfslokagreiðslu, sem jafngildir rúmum 13 milljörðum króna. 

Ljóst er allavega að hann er mörgum milljörðum ríkari og talið er að hann muni snúa aftur á Formúlubrautina á næsta ári, þegar sex mánaða uppsagnarákvæði í samningi hans við Red Bull rennur út.

Horner myndi hins vegar ekki snúa aftur eingöngu sem liðsstjóri heldur sem hluteigandi.

Svipað hefur sést hjá Mercedes og Aston Martin, þar sem liðsstjórarnir Toto Wolff og Lawrence Stroll eiga hlut.

Alpine er talinn líklegur áfangastaður hjá Horner.