Einar hættir af per­sónu­legum á­stæðum

Í fréttatilkynningu þess efnis segir að stjórn félagsins hafi fallist á ósk Einars, sem muni áfram gegna starfi framkvæmdastjóra þar til að ráðið hefur verið í starfið. Einar muni styðja við stjórn og arftaka sinn í því ferli. Starfið verði auglýst á næstu dögum.

Haft er eftir Dagnýju Hrönn Pétursdóttur, stjórnarformanni Ljósleiðarans, að stjórnin sé afar þakklát Einari fyrir störf hans.

„Starfstími Einars hjá Ljósleiðaranum hefur einkennst af mikilli fagmennsku og trausti. Hann kom til félagsins að loknu miklu fjárfestingarskeiði og fékk það verkefni að ná utan um reksturinn. Með elju og dugnaði hefur Einar ásamt öflugu stjórnendateymi Ljósleiðarans tekið ákveðin skref sem hafa skilað hagræðingu í rekstri og betri þjónustu til viðskiptavina. Félagið er vel í stakk búið að halda áfram að skipta máli á fjarskiptamarkaði og í því mikilvæga verkefni að tryggja örugga innviði hér á landi. Við erum Einari afar þakklát fyrir hans störf og óskum honum alls hins besta.“

Þá er haft eftir Einari að það hafi verið honum einstök gæfa að fá að leiða Ljósleiðarann í krefjandi verkefnum sem hann hafi fengist við síðustu tvö árin ásamt samstarfsmönnum sínum.

„Hér hef ég starfað með framúrskarandi fólki sem hefur með fagmennsku og metnaði gert félagið að því sem það er í dag. Það hefur verið heiður að fá að leiða félagið og ég fyllist stolti þegar ég horfi til baka á þann árangur sem við höfum náð saman. Ljósleiðarinn er á góðum stað í dag og fram undan er fjöldi tækifæra sem ég er ekki í nokkrum vafa um að félagið muni nýta vel. Ég mun styðja stjórn og eftirmann minn í framkvæmdastjóraskiptunum og hlakka til að sjá félagið vaxa og dafna áfram.“