Vill að nýtt flug­fé­lag taki á loft næsta sumar

„Þetta hefur verið í pípunum lengi og áður en að tíðindin bárust af Play,“ segir Usman Mehmood eigandi fyrirtækjanna í samtali við Vísi. Stefnt sé að því að félagið hefji sig á loft í júní 2026. Mbl.is greindi frá fyrirætlununum í vikunni en Mehmood opinberaði þær upphaflega á samfélagsmiðlinum Linkedin.

Usman er upprunalega frá Pakistan og hefur um árabil rekið fyrrnefnd ferðaþjónustufyrirtæki. Eitt þeirra, Glacier heli komst í fréttir í fyrra þegar flugmaður þyrlu lenti henni á malarstæði með þeim afleiðingum að skemmdir urðu á bíl sem þar var lagt.

Fljúgi ferðamönnum út frekar en Íslendingum heim

Á Linkedin segir Usman að eftir fall Play marki stofnun Glacier Airline nýtt upphaf. Ólíkt forvera sínum muni flugfélagið tengja saman flug, ferðaþjónustu og hótelrekstur. Þannig muni stefna félagsins byggja á sjálfbærum vexti, fjárhagslegum aga og áherslu á viðskiptavininn.

Á vef félagsins kemur fram að flugferðir verði farnar til London, Amsterdam, Parísar, Frankfurt, Kaupmannahafnar og Nuuk í Grænlandi. Usman segir viðræður nú standa yfir um leigu á flugvél, stefnt verði á flugferðir frá landinu í hið minnsta einu sinni í viku, með einni vél fyrst um sinn. Spurður hvort um raunhæfar áætlanir séu að ræða segir Usman að félagið eigi að vera með sterkan rekstrargrundvöll.

„Einbeitingin er ekki á flugfélag sem slíkt, heldur verður þetta smáforrit, vettvangur þar sem við munum ekki bara selja flugmiða, heldur ferðirnar í heild sinni. Meðalferðamaður eyðir 500 til 600 evrum í ferð og hingað til hefur flugfélagið einungis tekið um 60 evrur af því,“ segir Usman. Þannig verði félagið frekar rekið líkt og ferðaskrifstofa, líkt og NiceAir og Iceland Express. Áhersla verði á að selja erlendum ferðamönnum miða en ekki ferja Íslendinga til útlanda.