Saka FIFA um að stofna „gervi“ leikmannasamtök

Breska ríkisútvarpið segir frá því að FIFA hafi verið sakað um að grafa undan áætlunum um að takast á við velferðarmál leikmanna með því að ráðfæra sig við „gervi“ samtök.

Alþjóðasamtök leikmanna, FIFPRO, halda því fram að alþjóðaknattspyrnusambandið væri að „stofna FIFA-væn samtök fyrir samráðsferla í stað þess að eiga í samskiptum við viðurkennd fulltrúasamtök í fótbolta“.

Þau sökuðu FIFA um að beita „svipuðum aðferðum með umboðsmönnum og stuðningsmönnum“, sem þau sögðu vera áhyggjuefni.

FIFA tilkynnti um ýmsar aðgerðir í kjölfar fundar um velferð leikmanna í Rabat í Marokkó um helgina.

FIFPRO, sem er í forsvari fyrir sextíu og sex þúsund leikmenn á heimsvísu, sagðist ekki hafa verið boðið á fundinn.

Velferð leikmanna er vaxandi áhyggjuefni og höfðaði FIFPRO mál gegn FIFA í síðasta mánuði þar sem sagt var að leikjadagskráin væri svo þétt að heilsa leikmanna væri í hættu.