„Náðum að stríða þeim og það var mark­miðið“

„Við náðum heldur betur að stríða þeim og það var markmiðið fyrir þennan leik. Þannig að við erum bara nokkuð sáttar. Mér fannst úrslitin ekki endilega sýna hvernig leikurinn var, mér fannst við standa aðeins meira í þeim“ sagði Þórey einnig, skömmu eftir leik.

Eins og hún segir hékk íslenska liðið ágætlega í því þýska, en þegar líða fór á seinni hálfleikinn misstu þær Þjóðverjana full langt fram úr sér.

„Þá förum við að gera aðeins meiri mistök og þær fara að hlaupa í gegnum vörnina hjá okkur, en allt á undan því fannst mér við gera nokkuð vel“ sagði Þórey og var þá spurð hvað hefði gengið vel og illa.

„Mér fannst varnarleikurinn mjög flottur í þessum leik. Við náðum að standa mjög vel og leystum vel úr því þegar þær spiluðu ekki með línumann. Það var svolítið nýtt, við höfum ekki spilað á móti svona liði áður en mér fannst við gera það dálítið vel…

…Við erum með aðeins of mikið af töpuðum boltum, tæknifeilum og þannig, sem gerist í svona leikjum með hátt spennustig.“

Stressið var sjáanlegt á báðum liðum í kvöld, í opnunarleik fyrir stútfullri höll í Stuttgart.

„Skjálftinn er farinn núna en ég viðurkenni alveg að það voru pínu fiðrildi og pínu stress, en líka rosaleg tilhlökkun. Gott að byrja þetta mót á þessum risaleik, þetta var mjög skemmtilegt“ sagði Þórey að lokum en viðtalið má sjá í spilaranum.