„Eru kannski á mörkunum í sið­ferðis­legri markaðs­setningu“

Samkvæmt nýjustu mælingum rannsóknaseturs verslunarinnar nam aukning erlendrar netverslunar 12,8% frá sama tíma og í fyrra og verslun jókst um 30% ef bornir eru saman september og október á þessu ári. Hlutfall vara frá Kína hefur aukist mikið síðustu ár og er nú um 40% samanborið við 30% fyrir þremur árum síðan og eru netverslanirnar Shein og Temu risar á markaðnum.

Aðferðafræðin svipuð og hjá veðmálafyrirtækjum

Einar Þór Garðarsson sérfræðingur í netverslun segir aðferðafræði stórra netverslana í markaðssetningu vafasama.

„Það sem þessi fyrirtæki hafa kannski lært og eru með ansi marga viðskiptavini á sinni skrá, að þeir eru búnir að móta með sér aðferðafræði sem er erfitt að eiga við fyrir neytendur.“ 

„Þegar ég nefni spilafíkn í því samhengi þá er ég kannski að vísa í aðferðafræðina við það að fá þig til að versla og versla svo aftur þannig að þeir eru kannski á mörkunum í siðferðislegri markaðssetningu,“ sagði Einar Þór í viðtali í hádegisfréttum Bylgjunnar.

„Veit ekki hversu sjálfbært þetta er til lengri tíma“

Fyrirkomulag afsláttardaga hefur breyst síðustu misserin og afsláttartímabilin lengst.

„Við erum svona óvart búin að lengja í öllum þessum dögum og í dag eru þetta orðnir sirka tuttugu og fimm dagar í útsölu rétt fyrir jól.“

Sum íslensk fyrirtæki hafi þá farið þá leið að velja sér afsláttardaga að taka þátt í.

„Fyrir íslensku fyrirtækin þá segir það sig sjálft að vera í útsölu í heilan mánuð fyrir jól hefur áhrif á rekstur og á sama tíma þurfa þessi fyrirtæki að manna enn betur og hugsanlega að eyða meiru í markaðssetningu. Ég veit ekki hversu sjálfbært þetta er til lengri tíma því strax í janúar er komin útsala aftur,“ sagði Einar Þór að endingu.