Hundrað ára vaxtarræktarkappi

Bostinto hefur æft síðastliðin 87 ár og byrjaði þegar hann var aðeins tólf ára, að sögn eiginkonu hans, Francine.

„Við teljum að hann sé elsti vaxtarræktarkappi heims sem enn æfir,“ skrifaði Francine í færslu sem deilt var á Facebook-reikningi National Gym Association Inc.

Bostinto er stofnandi og forstjóri NGA, sem eru samtök um vaxtarrækt rekin án hagnaðarsjónarmiða, og Francine gegnir stöðu forseta samtakanna.

Sautján ára gamall var Bostinto þegar farinn að sitja fyrir í líkamsræktartímaritum.

Hefur gaman af því að æfa

„Ég hef gaman af því að æfa og fólk spyr mig hvenær ég ætli að hætta. Ég segi þeim að ég hætti þegar ég hætti að anda,“ sagði Bostinto í viðtali fyrr á þessu ári við Muscle & Fitness, tímarit sem fjallar um líkamsrækt og vaxtarrækt.

„Ég gerði allt sem ég vildi gera í vaxtarrækt og í hernum og stundum velti ég fyrir mér hvað sé eftir, en vitið þið hvað? Ég lifi lífinu enn fyrir sjálfan mig. Á meðan ég hef gaman af því sem ég geri ætti ég að halda því áfram,“ sagði Bostinto.

Í maí keppti Bostinto í vaxtarræktarkeppni NGA í Flórída, fjórum mánuðum eftir hundrað ára afmælið sitt. Hann hlaut æðstu verðlaun, meistarabelti og bikar, að því er fram kemur í Inside Edition.

Herra Ameríka öldunga

Árið 1977, 52 ára að aldri, vann hann „Herra Ameríka öldunga“. En hann er stoltastur af þjónustu sinni sem uppgjafahermaður í fótgönguliði bandaríska hersins í seinni heimsstyrjöldinni, en þar þjónaði hann í 29 ár.

Nú, jafnvel hundrað ára gamall, æfir Bostinto fimm til sex daga vikunnar, sagði hann í samtali við Muscle & Fitness. Hann hefur þurft að aðlaga æfingarnar sínar með aldrinum. Hann fékk vandamál í fótlegg vegna tíma síns í hernum og hefur áður fengið heilablóðfall.

„Ég finn leiðir til að bæta upp fyrir það þegar ég æfi. Til dæmis lyfti ég fótunum þegar ég geri magaæfingar til að halda kviðvöðvunum spenntum,“ sagði hann. „Og þó að hægri handleggurinn minn sé ekki eins góður og sá vinstri geri ég samt endurtekningar þar til ég finn fyrir því í hægri hliðinni,“ sagði Bostinto.

Ráð hans til upprennandi vaxtarræktarfólks er að „sjá fyrir sér það sem maður vill og leggja síðan hugann í það jafn mikið og vöðvana.“