Verð­lag lægst í Prís á átta al­gengum jólavörum

Í tilkynningu frá ASÍ segir að miðað sé við meðalverðmun á vörum sem fáanlegar eru í fleiri en einni verslun. Verðlag í Bónus og Krónunni liggi litlu ofar, en að jafnaði sé verð þar um tveimur til þremur prósentum hærra en þar sem varan finnst á lægsta verðinu.

Í tilkynningu segir að vinsælar vörur séu ekki endilega fáanlegar í öllum verslunum og að verðbreytingar geti verið tíðar á þessum árstíma. Til dæmis hafi sala á hátíðarís frá Emmessís byrjað í Krónunni á verðinu 1.549 krónur í nóvemberbyrjun, en hafi síðan lækkað í 1.180 krónur eða um tæpan fjórðung. Í tilkynningu segir að algengt sé að munur sé á stærðum innan og milli verslana og því geti verið gagnlegt að gera samanburð ætli neytendur sér í hagkvæm innkaup um jólin. Hægt er að gera það í Nappinu.

Verð á völdum hátíðarvörum má sjá í meðfylgjandi töflu.

Konfektið þúsund krónum ódýrara í Prís

Afar mikill munur getur verið á verði eftir því hvaða verslun og hvaða pakkning er valin. Hálfs lítra Pepsi í plasti kostaði til dæmis meira í Hagkaup (279 kr.) heldur en tveggja lítra Pepsi í Prís (259 kr.). Jafnvel sami eins kílóa kassinn af Nóa konfekti í lausu kostaði 1.100 krónur minna í Prís (5.399 kr.) en í Hagkaup (6.499 kr.).

Mandarínur í lausu fengust á 485 krónur kílóið í Prís, en kílóverð á klementínum var frá 611 krónum í Krónunni upp í 699 krónur í Hagkaup.

Lægsta kílóverð á laufabrauði var 2.653 krónur á ósteiktu laufabrauði frá Ömmubakstri í Prís. Ósteikt laufabrauð frá Ömmubakstri var ódýrara en ósteikt laufabrauð frá Kristjáns bakaríi í öllum fjórum verslunum þar sem bæði fengust það er í Prís, Bónus, Krónunni og Hagkaup.

Steikt laufabrauð frá Ömmubakstri var einnig ódýrara en steikt laufabrauð frá Kristjánsbakaríi í öllum verslunum þar sem bæði fengustm, samkvæmt verðlagskönnuninni, það er í Bónus, Krónunni, Nettó, Hagkaup og Fjarðarkaup. Samkvæmt könnun var munurinn á Ömmubakstri og Kristjáns steiktu laufabrauði allt frá sjö prósentum í Hagkaup upp í 18 prósent í Fjarðarkaup þegar kílóverð eru borin saman.

Vegan laufabrauð 70 prósent dýrara

Vegan laufabrauð frá Ömmubakstri var ódýrast í Bónus, en kílóverðið á því þar (7.539 kr.) var 70 prósent hærra en á ódýrasta steikta laufabrauðinu, sem var Ódýrt laufabrauð í Krónunni (4.410 kr./kg).

Fjarðarkaup buðu upp á lægsta kílóverð á Lindukonfekti, en 900 gr. kassi kostaði 3.998 krónur þar. Kassinn kostaði 4.289 krónur í Bónus en 4.999 krónur í Hagkaup. Kílóverðið á Lindukonfekti var nokkru lægra en á Nóakonfekti, sem var lægst 5.399 kr./kg í Prís fyrir eitt kíló af Nóakonfekti í lausu.

Kílóverð á 900 gramma kassa frá Lindu var lægra en kílóverð á eins kílóa Nóa konfektkassans í Prís í öllum verslunum nema Hagkaup, þar sem það var 5.554 krónur.

Hæsta kílóverð á Nóakonfekti í Bónus var á 135 gr. kassa, 14.995 kr./kg. Hæsta kílóverð í Bónus á Lindukonfekti var aftur á móti á 220 gr. kassa, 8.172 kr./kg. Verðbil á konfekti getur því verið sérlega breitt eftir því hvaða kassi er keyptur og í hvaða verslun.

Nýjasta samanburð á kílóverði konfekts og á öðrum vörum má finna á heimasíðu verðlagseftirlitsins. Þar má líka sjá að 900 grömm af Quality Street-molum kostaði frá 1.799 kronum í Prís upp í 2.299 krónur í Nettó.

Smjörið og rjóminn ódýrastur í Prís

Ódýrasta smjörið fæst í Prís, 798 krónur fyrir 500 grömm af smjöri sem jafnframt var lægsta fáanlega kílóverð á smjöri. Verð á smjöri í Kjörbúðinni og Extra var einungis krónu dýrara. Í Bónus og Fjarðarkaupum kostaði sama eining 819 krónur og verðið í Krónunni var krónu dýrara, 820 krónur. Smjörið var nokkuð dýrara í Hagkaupum, á 909 krónur.

Rjóminn er einnig ódýrastur í Prís þar sem 500 ml. af 36 prósent rjóma fæst á 749 kr. Verðið í Bónus (768 kr.) og Krónunni (769 kr.) liggur litlu ofar. Neytendum er þó bent á að hægt er að finna lægra lítraverð á rjóma í eins lítra fernu og getur munað um 100 krónum á lítrann á ódýrasta verði. Eins líters rjómi kostar 1.389 krónur í Prís borið saman við 1.395 krónur í Bónus og 1.396 krónur í Krónunni.

Suðusúkkulaði í baksturinn var einnig á lægsta verðinu í Prís ef borið er saman verð á Konsúm suðusúkkulaði frá Nóa-Síríus (300 gr.) og Lindu suðusúkkulaði (200 gr.). Lægsta kílóverðið á suðusúkkulaði er hins vegar að finna í Bónus, á Bónus suðusúkkulaði (2.330 kr.) sem er 5 krónum ódýrara en Lindu suðusúkkulaðið í Prís (2.335 kr.).

Jólasíldin ódýrust á tilboði í Nettó

Jólasíldin frá ORA var ódýrust í Nettó (899 kr.) þegar Verðlagseftirlitið fór á vettvang. Vert er að taka fram að síldin var auglýst á tilboði í Nettó þegar verðtaka fór fram en almennt listaverð er 1.099 kr. Alls munaði fjögur hundruð krónum á lægsta og hæsta verði en jólasíldin var dýrust í Kjörbúðinni og Extra, á 1.299 krónur. Einungis munaði krónu á verðum í Bónus (998 kr.) og Krónunni (999 kr.).

ORA-hátíðarsíld var einnig ódýrust í Nettó (742 kr.) þar sem hún var á tilboði en þar á eftir röðuðu sér Krónan (820 kr.), Hagkaup (949 kr.), og Fjarðarkaup (1.058 kr.). Dýrust var hátíðarsíldin í Kjörbúðinni á 1.099 kr. Marineruð síld frá ORA var ódýrust í Krónunni (598 kr.) en fyrir þá sem vilja erlenda síld mátti einnig finna síld frá Klädesholmen í nokkrum verslunum. Lauksíldin frá Klädesholmen var ódýrust í Fjarðarkaupum og kostaði 412 krónur.

Í tilkynningu segir að verðsamanburður geti líka verið vandmeðfarinn. Til dæmis hafi marineruð ORA-síld í 590 gr. krukku kostaði 829 krónur í Bónus en Gestus-marineruð síld í 600 gr. krukku kostaði 699 krónur í Krónunni. Munurinn sé 19 prósent, en munurinn á kílóverði varanna tveggja sé 21 prósent. Hins vegar sé þurrvigt síldarinnar 300 gr. hjá ORA, en 250 gr. hjá Gestus. Ef bara sú vigt væri skoðuð væri kílóverð síldarinnar lægra á ORA-síldinni í Bónus, 2.763 kr./kg á móti 2.796 kr./kg á Gestus-síldinni í Krónunni.

Lítill verðmunur á baunum

Nokkuð lítill verðmunur var á grænum og gulum baunum frá ORA, 420 gr., þegar horft er á krónutölumun milli verslana. Hlutfallslegur munur gat þó numið allt að fjórðungi milli lægsta og hæsta verðs. Lægsta verðið á grænum baunum var í Prís (238 kr.) en þar á eftir fylgdu Bónus (247 kr.), Krónan (248 kr.), Nettó (249 kr.) og Fjarðarkaup (259 kr.). Á gulum baunum var lægsta verðið hins vegar í Kjörbúðinni (290 kr.) og Extra (290 kr.) en þar á eftir fylgdu Bónus (297 kr.) og Krónan (298 kr.).

Hið sígilda rauðkál frá Beauvais var ódýrast á 379 kronur samkvæmt könnuninni í Bónus en hæsta verðið var að finna í Extra þar sem það kostaði yfir 40 prósent meira (529 kr.). Rauðkálið fannst einnig í Krónunni (380 kr.), Fjarðarkaupum (389 kr.), Nettó (419 kr.) og Hagkaupum (449 kr.).

Á meðfylgjandi súluriti má sjá verð á völdu meðlæti

Þriðjungsmunur var á lægsta og hæsta verði á malti og appelsíni í dós

Verð á malti og appelsíni í 500 ml. dós var lægst í Prís af þeim verslunum sem verðlagseftirlitið heimsótti. Það er jafnframt ódýrasta fáanlega lítraverð á þessum sígilda jóladrykk. Dósin var á 269 krónur í Prís, borið saman við 277 krónur í Bónus, 278 krónur í Krónunni og 279 krónur í Fjarðarkaupum. Allt að þriðjungsmunur var á lægsta og hæsta verði á malti og appelsíni í dós en hæsta verðið var að finna í Kjörbúðinni og Extra.

Ódýrasta flaska af kóki í gleri, 330 ml., var í Bónus á 225 krónur en hæsta verðið var 279 krónur í Hagkaupum og Kjörbúðinni. Sé ætlunin að finna lægsta lítraverðið er það að finna í kaupum á 4 x 2 ltr kókflöskum í Prís (144 kr./ltr).

Í tilkynningu kemur fram að sumar jólavörur hafi hækkað verulega frá í fyrra. Til dæmis hafi Malt og appelsín í dós kostaði 199 krónur í Extra í fyrra en kosti nú 349 krónur. Það er 75 prósenta hækkun.

Malt og appelsín í gleri hækkaði úr 209 krónum í 247 krónur í Bónus, eða um 18 prósent. Sama gildir um Krónuna, þar sem verðið fór úr 210 krónum í 248 krónur.

Freyju 46 prósent suðusúkkulaði kostaði 359 krónur jólin 2023 í Bónus, 395 krónur í fyrra (10% hærra en árið áður), en kostar nú 609 krónur (54% hærra en í fyrra og 70 prósent hærra en 2023).

Nóa konsúm suðusúkkulaði, 300 gr., hækkar um 35 prósent í Prís, úr 679 krónum í 919 krónur.

Verðlagseftirlit ASÍ kannaði verð á algengum jólavörum í 8 verslunum í síðustu viku en áður hafði eftirlitið birt verðkönnun á jólakjöti. Verðmunur milli vara og verslana getur verið mjög breytilegur. Þó að verðmunur kunni að vera lítill í krónum á smáum einingum getur oft verið um töluverðan hlutfallslegan mun að ræða og oft um miklar fjárhæðir að ræða þegar gerð eru stór innkaup fyrir jólin. Verð voru könnuð í Prís, Bónus, Krónunni, Nettó, Hagkaupum, Fjarðarkaupum, Kjörbúðinni og Extra.